Maun no biin-alin sira, bondia!
Iha sentru Evanjellu domingu dahaat Kuarezma nian ita hetan Jezús no mane matan-delek ida husi moris kedas (kf Jo 9,1-41). Kristu fó hikas matan moos ba nia no halo milagre ida-ne’e ho ritu simbóliku ida: uluknanai kahur rai ho kabeen no kose ba ema matan-delek nia matan; hafoin fó orden ba nia atu bá fase iha pixina Siloe nian. Mane ne’e bá, fase, no hetan fali matan moos. Nia ema ne’ebé delek husi moris kedas. Ho milagre ida-ne’e Jezús hatudu nia An mai ita nu’udar mundu nia naroman; no ema matan-delek husi moris kedas reprezenta ita ida-idak, ne’ebé Maromak hakiak atu koñese Nia, maibé tanba salan ita sai hanesan ema matna-delek sira, ita presiza naroman foun ida; ita hotu presiza naroman foun ida: ida fiar nian, ne’ebé Jezús haraik mai ita. Defaktu, ema matan-delek Evanjellu nian hodi hetan filafali matan moos nia loke an ba Kristu nia mistériu. Jezús husu ba nia: «Ó fiar iha Mane nia Oan?» (v. 35). «No nia sé, Na’i, atu ha’u fiar iha nia?», ema matan-delek ne’ebé kura tiha ona hatán (v. 36). «Ó haree ona Nia: nia mak ko’alia daudaun ho ó» (v. 37). «Ha’u fiar, Na’i!» no nia tuku tuur iha Jezús nia oin.
Epizódiu ida-ne’e lori ita atu reflete kona-b aita-nia fiar iha Kristu, Maromak nia Oan-Mane, no tempu hanesan refere mós ba Batizmu, sakramentu dahuluk fiar nian: Sakramentu ne’ebé halo ita “mai iha naroman”, liuhusi moris hikas iha bee no iha Espíritu Santu; hanesan akontese ho matan-delek husi moris kedas, ne’ebé nia matan sai nakloke depoizde fase iha bee pixina Siloe nian. Mane matan-delek husi moris mai no hetan kura reprezenta ita bainhira ita konxiente katak Jezús mak roman, «mundu nia naroman», bainhira ita haree ba fatin seluk, bainhira ita prefere konfia ba naroman ki’ik-oan sira, bainhira ita dolar iha nakukun laran. Faktu katak ema matan-delek la iha naran ida tulun ita atu haree ita-nia oin iha nia no ita-nia naran iha ninia istória. Ita mós “hetan naroman” husi Kristu iha Batizmu, nune’e ita simu bolun atu komporta an nu’udar naroman nia oan sira. No komporta an nu’udar naroman nia oan sira ezije mudansa radikál ida mentalidade nian, kapasidade isa atu julga ema no sasán sira tuir eskala seluk valor, ne’ebé mai husi Maromak. Sakramentu Batizmu nian, defaktu, ezije hilin atu moris nu’udar roman nia oan sira no la’o iha naroman. Se ohin ha’u husu ba imi: “Imi fiar katak Jezús mak Maromak nia Oan? Imi fiar katak nia bele muda fuan? Imi fiar katak nia bele halo haree realidade nu’udar Nia haree, la’ós nu’udar ita haree? Imi fiar katak Nia mak romak, ne’ebé haraik naroman loos?” Saida mak imi sei hatán? Ida-idak hatán iha ninia fuan.
Saida mak signifika naroman loos, la’o iha naroman? Signifika uluknanai husik naroman falsu sira: naroman malirin no beik prejuizu nian kontra ema seluk, tanba prejuizu hakleuk realidade no hakonu ita ho ódiu kontra ema sira ne’ebé ita julga lahó mizerikórdia no ita kondena lahó apelu. Ida-ne’e mak paun loroloron nian! Bainhira ita ko’alia aat kona-ba ema seluk, ita la la’o iha naroman, ita la’o iha nakukun. Naroman falsu seluk, tanba babeur no ambíguu, mak ida interese pesoál nian: se ita avalia ema no sasán sira bazeia ba kritériu ita-nia util nian, ita-nia prazér nian, ita-nia prestíjiu nian, ita la halo lia-loos iha relasaun no situasaun sira. Se ita la’o iha lurón atu buka de’it interese pesoál, ita la’o iha nakukun.
Virjen Santa, ne’ebé uluk liu atu simu Jezús, mundu nia naroman, halo ita hetan grasa atu simu hikas iha Kuarezma ida-ne’e naorman fiar nian, hodi deskobre don folin boot Batizmu nian, ne’ebé ita hotu simu tiha ona. No naroman foun ida-ne’e nakfilak ita-nia atitude no asaun sira, atu ita mós, husi ita-nia pobreza, husi buat uitoan ita iha, sai maklorik Kristu nia naroman nian.
