Liturjia domingu ne’e nian konvida ita atu reflete kona-ba Igreja – komunidade ne’ebé moris husu Jezús; Igreja nia membru sira kontinua Jezús nia “dalan”, hodi fó sasin kona-ba Maromak nia projetu iha mundu, iha saran an ba Maromak, iha domin ba ema sira.
Evanjellu define Igreja: komunidade dixípulu sira-nian ne’ebé tuir Jezús nia “dalan” – “dalan” obediénsia nian ba Aman no saran an nian ba maluk sira. Ema sira ne’ebé simu proposta ne’e no aseita atu moris iha dinámika ida-ne’e, sai Ema Foun, tama iha Maromak nia família – família Aman, Oan no Espíritu nian.
Leitura dahuluk aprezenta mai ita karakterístika ruma “família Maromak nian” (Igreja): komunidade santa, maski forma husi ema maksalak sira; komunidade ida estrutura ho forma ierárkika, maibé hala’o servisu autoridade iha diálogu ho maun-alain sira; komunidade ida serví-na’in nian, ne’ebé simu don sira Maromak nian no tau don sira-ne’e atu serví maluk sira; no komunidade ida ne’ebé Espíritu nia kbiit mak anima, moris iha Espíritu no simu husi Espíritu kbiit atu sai sasin Jezús nian iha istória.
Leitura daruak mós refere ba Igreja: hanaran nian “templu espirituál”, iha-nee’bé Kristu mak “fatuk-inan” no sarani sira mak “fatuk moris”. Igreja ne’e forma husi “povu nai’lulik”, ho misaun atu oferese ba Maromak kultu loos: moris ida iha obediénsia ba Aman nia planu no iha domin inkondidionál ba maun-alin sira.
