Venilale – Iha Domingo daneen tempu baibain nian, Komunidade 2 iha Venilale (Maria Mazzerello no Maria Auxuliadora) selebra abertura oratóriu hamutuk. Bazeia ba tema iha leten iha liafuan bemvinda nian ba oratorianu/a sira Ir.Olga FMA dehan: ohin loke ita-nia oratóriu hamutuk ho ʺLaudato Siʺ, proposta neʼebé Amu-Papa Francisco konvida nafatin ita atu hadomi nafatin natureza tanba Maromak nia kriatura no tau matan ba ita nia uma komun katak ita hotu mak responsavel ba uma-komún hodi halo asaun ruma liu husi kuda ai horis, zero plastiko no la soe foer arbiru. Ohin ita hahú lansamentu maski seidauk iha planu asaun maibé ita empeña an atu kada Domingu hamutuk ho animadór/a sira halo asaun ruma atu tau matan ba ita-nia uma-komún.
Atividade sira neʼebé ami halao mak tuir mai:
- Misa hamutuk iha paroquia Sagrado Coração de Jesus Venilale
- Oratorianu/a sira hamutuk ho animadór/a sira halo asaun hodi kuda kedas ai-funan iha igreja oin ho intensaun atu ai-funan sira neʼe bele halo dekorasaun iha igreja laran.
- Halo Peregrinasaun espirituál hodi koñese santu salezianu sira nia moris: São Francisco de Sales, São João Bosco no Beata Laura Vicuña.
- Jogos amizade entre oratorianu/a sira : dada tali, dansa kadeira no tebe bola.
- Iha tempu hanesan oratorianu/a no animadór/a sira fó bemvindu ho ksolok ba padre rejionál salezianu nian pe.Joseph Phuoc nia vizita iha Venilale hodi hananu Viva Don Bosco.
Liu husi atividade ohin nian buat neʼebe tulun ami nuudar oratorianu/a no animadór/a mak pergunta ida husi Ir. Carolina FMA ʺtanba sá imi mai oratóriu?ʺ Iha oratóriu ita aprende buat barak hanesan reza, jogu sira, dansa , aprende atividade manuál sira, halimar no haksolok hamutuk ho objetivu ida atu koñese di’ak liután Kristu, hadomi Nia no halo tuir Nia hanorin sira liu husi katekeze semanál nian.
(Domingas da Silva FMA)
