HALIMAR, HAKSOIT, HAKILAR MAIBÉ LABELE HALO SALA
Ir. Noemia de Deus.
Venilale, 12 Fevereiru 2023. Loron furak nakonu ho ksolok tamba halo Abertura ba Oratorio Sentru Komunidade Maria Auxilidora Venilale, nune’e bele hasoru fali oratorianu sira iha Sentru ida-idak. Tema ba abertura ba oratoriu 2023 nian “Halimar, Hakilar, Haksoit maibe Labele Halo sala”. Iha Sentru Tolu mak hanesan: Sentru Oratoriu Miguel Magone Waihako ne’ebé muda ona mai iha Edifisu Posto Administrativu nia oin, se tempu udan sei uza fatin iha Merkadu laran ne’ebé mamuk, Sentru Oratoriu S. Francisco de Sales Lia-Ho’o (Lia-Oli) no Sentru Oratoriu Waibua.
Iha tempu feriadu ne’ebé naruk ituan husi tinan to’o tinan foun halo labarik no foinsa’e barak mak troka ona nia chanel ba atividade seluk. Atu bele hafanun fali sira mak ho maneira halo abertura nune’e bele konvida fali sira atu mai partesipa ho ativu iha sentru Oratoriu sira.
Atividade sira mak iha relasaun ho tema ne’ebe’ mensiona ona iha leten. Hahu ho Orasaun, animasaun, Jogos, simu prezente no fila uma. Sira hotu partesipa ho ksolok no entuziasmu. Ami la halo marsa haleu bairu (pawai) tamba udan bo’ot. Nune’e iha Sentru Oratorio Miguel Magone uza espasiu iha Merkadu laran ne’ebé hetan ona lisensa husi Autoridade Lokal no Postu Administrativu.
Iha orasaun nia laran ami reflete mos kona ba Estreia Reitor Maior nian “Nu’udar fermentu iha familia umana ohin loron”, hodi hare ba Ingridentes sira santidade nian mak hanesan: Alegria; halao didiak kna’ar estudu no orasaun nian; halo diak ba ema seluk.
Loron ida ne’e ami tebes duni halimar, hakilar no haksoit ho ksolok no iha empeñu atu moris tuir mensajen Reitor-Mor nian iha Estréia tinan ida ne’e nian, liuliu atu pratika ingredient sira Santidade nian iha moris lor-loron.
