Dili – Iha loron 1 Abríl 2022, Kreda Timor-Leste halo istória foun hodi inaugura Tribunál Ekleziástiku. Serimónia hahú ho orasaun ne’ebé diriji husi padre Angelo Salsinha, hafoin padre Paulus Maia nu’udar Chanceler le’e Dekretu aprovasaun ba “TRIBUNAL ECLESIÁSTICO” ho assinatura Apostólika ne’ebé foti nu’udar “Supremo Tribunal” ba Dioseze tolu iha Timor. Le’e hotu tiha Padre Graciano Santos Barros, nu’udar Vigário Judicial, hato’o nia diskursu hodi aprezenta kona-ba ba istória no prosesu oinsá ikus mai bele loke duni “Tribunal Eclesiástico” ida-ne’e. Iha momentu hanesan nia mós agradese ba ema oioin ne’ebé durante ne’e tulun no fó apoiu atu bele realiza Tribunál ida ne’e.
Hafoin Don Virgilio do Carmo da Silva, SDB nu’udar Arsebispu Metropolita Dili nian, hato’o nia diskursu badak no ikus iha mós diskursu husi “Encarregado da Sé Apostólica” iha Timor Leste, Mons. Marco Sprizzi.
Hotu tiha diskursu sira, kontinua kedas ho Abertura Ofisiál ba “TRIBUNAL ECLESIÁSTICO” husi Don Virgilio do Carmo da Silva, SDB. Hafoin konvidadu sira hetan oportunidade atu bele halo vizita ba ofísiu “TRIBUNAL ECLESIÁSTICO” nian.
Serimónia kontinua fila fali ho palestra husi padre. Feliks Mikel Kosat, SVD, “Vigario Judicial da Diocese de Atambua”, ne’ebé ko’alia kona-ba “O Processo de Anulação Matrimonial e Apoio Espiritual e Pastoral para os Cônjugues”. Nia aprezentasaun interessante tebes tanba la’o hamutuk ho situasaun atuál ne’ebé oras ne’e família barak enfrenta hela. Ita reza atu ho tribunál ne’e bele fó tulun no salva ema barak nia klamar tuir sira nia emblema: “Salus Animarum, Supremo Lex”.
(Suzana Alves dos Santos FMA)
