Retiru Anuál FMA grupu 3
Dili – Retiru Anuál FMA grupu datoluk hahú iha 28 Jullu loraik ho liafuan abertura husi Ir Alma Castagna, provinsiál FMA TIN no Missa abertura ba Espíritu Santu selebra husi pregadór, Pe.Mário de Sousa SDB.
Hanesan baibain introdusaun hahú nafatin ho lia-menon foti husi Konstituisaun FMA nian kona-ba saida mak Ezersísiu Espirituál no ninia finalidade “atu fó impulsu foun iha dalan santidade nian” (Konst 46) hodi iha loron ualu nia laran halo konfrontu ho Liafuan no ho Konstituisaun sira (R 33).
Atu halo retiru didi’ak, Ir Alma konvida Irmán sira atu asume atitude “silénsiu” hodi husik Na’i hamonu rezisténsia sira, nune’e ita bele rona Nia ko’alia mai ita. Ir Alma sita Papa Francisco nia omilia iha loron 26 Maiu ne’ebé nia subliña liafuan tolu, katak, “memória, orasaun no misaun”. Memória kona-ba enkontru ho Na’i, momentu Nia bolu ita. Ne’e mak ezersísisu ida Ir Alma husu atu halo hodi hateke fali ita-nia istória moris nian, oinsá ita-nia vokasaun moris. Orasaun katak enkontru ho Na’i, kontempla Ninia prezensa. Iha retiru ita iha tempu hotu atu reza ho hakmatek. Misaun mak Jezús nia mandatu mai ita atu bá halo ema sai eskolante. Maibé, iha retiru ne’e, ita para husi atividade sira, no koko halo “slide show” ida kona-ba ema hotu ne’ebé ita hanoin no harohan ba sira, aprezenta sira ba Jezús.
Iha retiru FMA sira-nian nafatin hahú ho Missa ba Espíritu Santu, katak konvite atu rona ho dosilidade Mestre interiór ne’ebé prezente iha ita-nia moris espirituál, kolabora ho Nia (Konst.7) atu forma ita-nia an tuir estatura Kristu nian. Hafoin labele haluha “Na’i-Feto, Inan no Mestra” atu husu ninia intersesaun hodi gia ita ba Jezús, hanorin ita sai espesialista “amorevolezza” nian, ita-nia marka karizmátika. Nune’e, ita buka fó espasu ba “fini Maromak nia Liafuan” nian atu troka ita-nia moris husi laran.
Iha Missa, padre Mário salienta buat esensiál rua ne’ebé liafuan “retiru” no “espirituál” komunika. Retiru katak para husi preokupasaun sira, atividade rotina sira… atu fó tempu atu haloos buat “espirituál”, lialoos interiór, kona-ba moris ho Kristu. No mestre retiru nian mak Maromak rasik. Faktu katak ita iha ne’e, signifika katak Maromak iha buat ruma atu dehan mai ita, nune’e ita prepara an, buka sai “rai-bokur” atu fini Ninia Liafuan nian bele moris, buras no fó fuan.
Hanesan Marta ne’ebé dehan ba nia alin Maria “Na’i husu ó”, iha loron festa Santa Marta nian, ita husik nia liafuan ko’alia mós mai ita, katak “Na’i buka ita”.
Tema retiru anuál ba grupu datoluk ho partisipante 45 (inklui mós Irmán na’in lima husi Kongregasaun seluk) mak “Ad maiorem natus”, iha lia-inglés “Born for the greater things”, eh “moris ba buat boot liu”. Tebes duni, Maromak bolu ita ba buat boot liu! Maibé, sá loos sasukat “maiorem” ka “great” eh “boot” nian ne’e mai relijioza/u sira? Ida-ne’e la’ós sasukat tuir mundu nian ho títulu barak, ho soin barak, ho naran boot, maibé sasukat “kenosis” nian eh hamamuk an nian. Sasukat ne’e mak radikalidade evanjélika, hanesan Kristu rasik hatudu ho nia moris. Aplika mai ita, ne’e husu atu sai ema místika, katak moris de’it iha Maromak eh primadu Maromak nian, hatudu profesia moris fraterna nian no sai atan ba ema sira ne’ebé kiak no ki’ik liu.
