RV – “Miserikórdia mak ha’u hakarak, la’ós sakrifísiu”. Husi fraze hetan iha kontestu vokasaun Mateus nian, Papa Francisco afirma iha katekeze kuarta, 13 Abríl katak, atitude relijioza ne’ebé la mai husi arrependimentu, la efikás. Hodi hanoin figura Jezús nian nu’udar “médiku divinu”, nia hatudu ai-moruk rua atu kura salan sira: Liafuan no Eukaristia.
Mateus mak kobradór impostu nian, tanba ne’e, nia ema sala-na’in públiku ida. Maski nune’e, ninia vokasaun loloos hetn konfirmasaun ho Mestre nia bolun, maibé ida-ne’e la halo ita nia sai perfeitu. “Loos katak sai sarani la halo ita la sala. Mateus, publikanu, ita ida-dak entrega an ba Na’i nia grasa maski ita-nia salan sira. Ita hotu ema maksalak, ita hotu halo sala. Dal ida ha’u rona provérbiu ida furak liu: la iha santu lahó pasadu, no la iha maksalk lahó futuru. Furak buat ne’e, buat ne’ebé Jezús halo”, Amu-Papa fó hanoin.
Muru ne’ebé fahe ita husi Maromak
Francisco fó hanoin, katak presiza supera barreira orgullu no foti-an nian, komportamentu sira ne’ebé hadook ita husi Maromak. Amu-Papa enfatiza katak moris sarani mak eskola haraik-an nian ne’ebé loke an ba grasa, maibé ida-ne’e ema ne’ebé hanoin nia an “justu” no di’ak liu ema seluk labele komprende.
“Foti-an no orgullu la permite atu ita rekoñese ita-nia nesesidade salvasaun nian, aliás, impede atu haree Maromak nia oin laran-sadia nian no iha hahalok laran-sadia nian. Muru ida, foti-an no orgullu, muru ida ne’ebé impede relasaun ho Maromak”.
Médiku Divinu
Amu-Papa Frnacisco reflete kona-ba Jezús ne’ebé aprezenta an nu’udar Médiku Divinu, ho ai-moruk rua: Liafuan no Eukaristia. “Ho Liafuan, Nia revela an no konvida ita ba diálogu ida entre belun sira: Jezús la ta’uk atu ko’alia ho ema maksalak sira, publikanu sira, prostituta sira. Nia la ta’uk, nia hadomi ema hotu. (…) Dala ruma, Liafuan ne’e halo kanek tanba kona laran-makerek sira, hasai máskara deskulpa falsa sira, lori ba li’ur lialoos ne’ebé subar; maibé tempu hanesan ilumina no purifika, fó forsa no esperansa, mak rekonstituinte presizu iha ita-nia dalan fiar nian”.
Ai-moruk daruak ba arrependimentu sinseru fian sarani nian mak Eukaristia, ne’ebé habosu ema ho Jez’us nia moris rasik no hafoun grasa batizmu nian.
Iha konkluzaun katekze nian, Papa Francisco fila fali senáriu Jezús nian ne’eb´edialoga ho farizeu sira atu fó hanoin katak, maski aliansa ho Maromak no mizerikórdia, orasaun sira Israel nian inkoerente no nakonu ho liafuan mamuk, ‘relijiozidade ida leten nian” de’it.
“‘Mizerikórdia mak ha’u hakarak, eh, fuan ida ne’ebé ho lealdade rekoñese ninia salan rasik, ne’ebé arrepende no fila fali atu sai fiél ba aliansa ho Maromak. ‘No la’ós sakrifísiu: lahó fuan ne’ebé arrepende, asaun relijioza hotu la efikás”.
