Dili – Iluminasaun eh input loron daruak programasaun nian ne’ebé importante tebes nia tema mak “Akompaña foin-sa’e sira iha orasaun”, hato’o husi Pe. Jose San Juan SDB (Pe. Jojo), pároku iha Quelicai (Baucau).
Akompañamentu iha foin-sa’e sira nia vida, sempre kona ita-nia vida no klamar, basá ita-nia misaun mak lori joven sira ba Maromak. Nune’e ita tenke la’o hamutuk, ita sente, joven sira dezafia ita basá sira husu ita ko’alia kona-ba ita-nia esperiénsia orasaun iha ita-nia vida rasik. Ba ita ne’ebé gia, presiza mós simu akompañamentu iha orasaun. Ne’e ita-nia sasin. Ho dalan ne’e, ita bele hada’et ba joven sira esperiénsia orasaun di’ak.
Wainhira ita koalia kona-ba orasaun iha vida joven nian, ita dehan kona-ba sira nia ligasaun ho Maromak, iha dalan partikular joven sira nian, oinsá sira sai belun ba Maromak. Sira iha espiritualidade diferente husi ita (adultu akompaña-na’in), úniku. Basá espiritualidade nu’udar adultu la’os joven nian (ambiente la hanesan). Ita akompaña sira, nune’e presiza espiritualidade akompaña-na’in nian:
- Hatene joven sira nia espiritualidade, aprende katak valór sira barak iha espiritualidade joven nian ne’ebé lakon ona iha espiritualidade adultu nian nebe presiza ‘restore” hatama fali buat ne’ebé lakon. Atu nune’e ita gia sira tuir buat ne’ebé relevante ba sira.
- Ita ajuda joven apresia sira nia espiritualidade no ajuda sira pratika ho fidelidade iha sira nia moris loron-loron nian.
Joven sira nia fuan mak:
- Fuan ne’ebé hamlaha. Joven sira hamlaha ba buat ne’ebé espirituál.
- Fuan ne’ebé fraku no frajil.
- Fuan ne’ebé sempre haksolok. Maski fraku joven sira, sira mós gosta no hakarak buat ne’ebé fó ksolok, hamnasa, oin midar. Joven sira mak moris-na’in. Sira otimista, haree no hakarak atu ‘enjoy life” (menikmati hidup).
- Fuan ne’ebé buka sai “maduro”. Joven sira presiza akompaña-na’in ne’ebé adultu, la presiza akompañadór/a egoista ka orienta ba nia an rasik.
Konkluzaun
Edukasaun joven sira iha vida orasaun implika:
- Ita mós kona/partisipa/envolve.
- Akompañadór/a no ida-ne’ebé simu akompañamentu eh joven, rua ne’e eduka malu.
- Atu akompaña di’ak joven sira, presiza mós akompañamentu ba gia.
- Joven sira iha espiritualidade la hanesan adultu sira nian.
- Akompaña joven sira nia fuan ne’ebé hamlaha ba Maromak, ne’ebé fraku, ne’ebé moris ho ksolok no buka sai tasak.
