Venilale – Loron sira vizita kanónika provinisiál FMA iha komunidade Maria Mazzarello (Venilale) husi 1-8 Abríl. Iha loron hirak ne’e, superiora nia vizita, tuir tradisaun saleziana iha objetivu atu kria komuñaun iha espíritu família, fidelidade ba konstituisaun no laran manas ba obra apostólika sira.
Iha oportunidade ida-ne’e, Ir Alma Castagna, provinisiál, fó nia tempu atu haree, rona, partilla no oferese input no observasaun sira ba komunidade ne’ebé nia vizita. Obra sira iha komunidade Maria Mazzarello konsiste iha eskola tékniku-vokasionál, internatu ba menina sira, klínika ba moras sira, oratóriu sira, nst. Obra sira ne’e hala’o iha kolaborasaun ho leigu sira no animadór/a joven sira.
Iha ninia vizita no enkontru sira ho grupu oioin hanesan leigu/a kolabora-na’in sira, ADMA, animadór/a no edukadór/a sira, Ir Alma enkoraja sira atu sai ema sira nee’bé hatene akompaña foin-sa’e sira sai protagonista/pró-ativu ba sira nia moris, hodi deskobre Maromak nia hakaran ba sira, katak, soi moris nakonu, sai akompañadór/a sira ne’ebé moris Sistema Preventivu, hanesan Don Bosco no Madre Mazzarello hanorin. Nia husu atu sai ema ho fuan oratorianu, katak, konxiénsia kona-ba ita-nia identidade edukativa, hamutuk ho empeñu atu moris ho modu konstante espíritu da mihi animas iha obra eh knaar hotu ita hala’o. Ho “fuan oratorianu” ita-nia obra hotu sai oratóriu. Ita buka filafali ba esperiénsia Valdocco nian atu ita bele kualifika no orienta ita-nia misaun iha edukasaun foin-sa’e sira-nian ba fiar. Fuan oratorianu tenke dudu ita atu haree mós nesesidade sira iha ita-nia sori-sorin, no dezafiu ida husik hela ba komunidade mak “loke oratóriu foun”, iha-ne’ebé ema husu atu ita bá.
Loron ikus vizita nian mak loron agradesimentu nian. Hahú ho Eukaristia selebra husi Pe. Abraão sdb, no hafoin kontinua ho konvíviu ho tema “Enkontru ne’ebé kontinua ho akompañamentu”, iha-ne’ebé grupu oioin foin-sa’e sira eskola nian halo aprezentasaun kona-ba Miguel Magone nia moris. Iha aprezentasaun nia rohan sira hananu “Dove abiti”, hodi espresa oinsá foin-sa’e sira hakarak “moris ida lahó limite”, moris nakonu, no moris ne’e Kristu de’it mak bele fó. Ida-ne’e sai mós Ir Alma nia rekomendasaun ikus ba joven sira, atu sai hanesan Miguel Magone ne’ebé iha “moris ida lahó limite” no husu atu sira hateke ba Magone nu’udar modelu, “lori bá oin buat ne’ebé foin-sa’e ida-ne’e fiar, moris”. Nia husu atu joven sira mós “la iha limitasaun ba domin, la iha limitasaun ba ema seluk nia di’ak”, hanesan Jezús ne’ebé tan domin mai ita la sura nia terus, la sura nia kolen, la sura mós nia moris mai ita”, buat ne’ebé ita sei reflete iha Semana Santa ne’e.
