Dili – Regulamentu n. 40 FMA nian husu atu “Iha komunidade lokál no inspetoriál sei selebra “festa Gratidaun nian”, momentu signifikativu vida família nian, ho komunidade edukativa nia partisipasaun”. Artigu ne’e mós esplisita katak festa ne’e selebra iha “klima orasaun nian, simplisidade no ksolok nian” hodi “esprime gratidaun no afetu ne’ebé halo ita sai ida de’it ho Superiora sira no entre ita”.
Loos duni! Nune’e duni mak Komunidade Edukativa selebra festa ne’e, hahú husi loron 25 Agostu, harohan ba malu, ba komunidade 13 Timor-Indonesia nian. Festa Gratidaun Inspetoriál mak “Ami agradese ita, tan la’o hamutuk ho ami hanesan Maria” no íkone bíblika mak Maria iha dalan ba vizita Isabel. Aleinde reza ba malu, iha mós momentu “Lectio Divina” iha lokál.
Festa loloos hahú iha 7 Setembru ho Diretora uma sira-nian, nu’udar kolabora direta Inspetora nian. Loron nia tutun mak loron Natividade Na’i-Feto nian, ho prezensa reprezentante sira husi Komunidade 13 Inspetoria nian. Hahú ho Eukaristia, prezide husi Pe Agostinho Soares ne’ebé iha ninia omilia konvida atu komunidade edukativa hateke ba Maria nu’udar modelu, uluknana’i iha ninia fiar, ninia dixipuladu, hafoin iha kompromisu misaun nian hodi fó sasin ho moris.
Depoizde Eukaristia, Komunidade Edukativa hamutuk ho Provinsiál hakat ba salaun ne’ebé prepara prezente sira, ne’ebé iha tinan ne’e, sei oferese ba Komunidade foun Bondo Kodi, Sumba (Indonesia). Konserteza iha almosu konfraternizasaun ho konvíviu. La iha festa saleziana ida lahó konvíviu, teatru, knananuk, dansa. Hodi tuir tema festa nian, komunidade sira aprezenta kona-ba Maria nia prezensa iha Fundadór no Fundadora nia moris, iha ita-nia Institutu uluk no ohin loron.
Ir Alma iha ninia liafuan ikus hateten katak “furak atu iha loron Natividade Na’i-Feto nian ita-nia íkone kona-ba Maria la’o ho Jezús iha ona knotak hodi ba vizita nia prima no, imi-nia aprezentasaun kantu no buat hotu hatudu prezensa Na’i-Feto nian iha ita-nia istória nu’udar salezianu”. Nia dehankatak husi ne’e iha mensajen ida ba prezente hotu: “Maria moris tanba iha projetu ida… Nune’e, laiha ema ida ne’ebé moris ne’ebé la iha projetu. Ha’u hanoin katak Maromak fó moris mai ita no fó moris atu ida-idak halo buat ruma iha mundu ida-ne’e”. No nia husik lia-meno atu “ida-idak tenke deskobre” saida mak nia tenke halo.
Ikusnian, Provinsiál fó hanoin kona-ba “Amorevolezza” iha relasaun edukativa, ita-nia marka karizmátika nu’udar saleziana. Nia fahe ba leigu, joven no labarik sira kamizola kona-ba direitu menoridade nian no ba komunidade banner ki’ik ida atu fó hanoin nafatin ita-nia Sistema Preventivu. Ir Alma hateten: “Iha-ne’e ita ajuda malu: labarik, adultu sira hatais ida-ne’e atu agradese no madre sira hateke ba faru ida-ne’e hodi dehan: ‘Obrigada Na’i ne’ebé fó vokasaun atu hadomi didi’ak foin-sa’e sira”.
