RV/Redasaun – Iha katekeze kuarta, 8 Novembru, Amu-Papa Francisco hahú siklu foun reflesaun nian dedika ba Santa Missa no Eukaristia. Amu-Papa salienta katak fundamentál tebes atu sarani sira komprende didi’ak valór no signifikadu Missa nian atu moris plenamente relasaun ho Maromak.
“Ita keta haluha númeru boot sarani sira-nian ne’ebé, iha mundu tomak, iha tinan 2000 istória nian, reziste to’o mate atu defende Eukaristia; no hirak mak, ohin loron mós, sei ariska sira-nia moris atu partisipa iha missa domingu-domingu”.
Papa Francisco hakarak atu iha katekeze sira-ne’e hatán ba pergunta importante ruma kona-ba Eukaristia no Missa, atu deskobre hikas, eh deskobre, oinsá liuhusi fiar Maromak nia domin naksira liuhusi mistériu ne’e.
Amu-Papa Francisco sita ‘Concílio Vaticano II’, ne’ebé promove renovasaun adekuada Liturjia nian atu lori sarani sira komprende fiar nia grandeza no beleza enkontru nian ho Kristu. Tema sentrál ne’ebé Padre konsiliár sira destaka mak formasaun litúrjika sarani sira nian, indispensavel ba renovasaun loloos ida.
Eukaristia, Amu-Papa esplika, mak akontesimentu maravillozu ida, iha-ne’ebé Jezús Kristu halo nia An sai prezente; partisipa iha Missa katak moris hikas Na’i nia terus no mate ne’ebé salva.
“Na’i iha-ne’ebá ho ita, prezente. Maibé dalabarak, ita bá iha-ne’ebá, ita ko’alia bainhira amlulik selebra Eukaristia, ita la selebra ho nia. (…) Ita tenke hanoin kona-ba ne’e. “Padre, tanba Missa sira-ne’e bosan” – “Maibé, ó dehan saida, Na’i bosan?” – “La’e, la’e, Missa la’e, padre sira” – “Ah, atu padre sira konverte, maibé Na’i iha ne’ebá!”. Komprende?”.
Amu-Papa halo pergunta ruma hanesan tanba sá halo sinál krús nian no atu penitensiái iha inísiu selebrasaun nian, signifikadu leitura sira-nian, tanba sá amlulik, iha momentu ida Missa nian, dehan “Foti neon ba Maromak”. “Nia la dehan foti telemovel sira atu hasai foto! La’e! Ha’u triste bainhira haree sarani barak ho telemovel foti sae. La’ós de’it sarani sira, maibé amlulik balun mós no até bispu sira. Missa la’ós espetákulu ida, maibé bá hasoru Na’i nia terus no moris-hi’as. Hanoin bá: to’o ona ho telemovel sira”.
“Liuhusi katekeze sira-ne’e, ha’u hakarak deskobre hikas fali ho imi beleza ne’ebé haksumik iha selebrasaun eukarístika no bainhira manifesta, fó sentidu nakonu ba ita ida-idka ni amoris. Atu Na’i-Feto akompaña ita iha etapa foun dalan nian”.
