Baucau – Iha loron 5 Janeiru, Padre, Relijiozu/a no sarani tomak dioseze Baucau nian halibur hamutuk ho Amu Bispu Don Basilio iha katedral hasae misa agradesimentu ba aniversariu ordenasaun tinan 20 nu’udar bispu.
Iha omilia Amu Bispu agradese ba buat tolu; primeiru agradese Na’i ba grasa moris nian ne’ebé nia simu basá bele haree tan tinan foun ida ne’e. Daruak, agradese ba Maromak ba grasa vokasaun ne’ebé Maromak haraik ba nia. Bazeia ba S. Paulo nia surat ba sarani sira iha Efesu ne’ebé dehan: “Maromak nia grasa be haraik mai ha’u ba imi nia di’ak” ho ida ne’e Amu hatutan liután katak “dala ruma sai fiel no badinas ba misaun ne’ebé simu maibé dala ruma lae, maske nune’e Maromak hili ha’u atu sai Maromak nia grasa ba ema tomak”. Ikus liu amu konvida sarani sira atu reza ba idak-idak nia an nune’e misaun saida de’it ne’ebé Maromak entrega mai ita, ita hala’o ho di’ak tuir Ninia hakarak.
Depoizde misa Amu Bispu halo abertura ba tinan 20 Dioseze Baucau moris no sei taka iha Novembru tinan ida ne’e. Iha abertura ne’e hahú ho konsertu palku muzikál husi Komisaun Juventude Dioseze Baucau.
Remata tiha programa abertura nian kontinua ho han hamutuk iha salaun Dioseze iha klima família no festa nian. Maski sarani sira uitoan de’it mak partisipa, inklui mós komunidade relijioza/u balun de’it, maibé eventu ne’e importante liu basá fó hanoin ba sarani sira katak ita nia Dioseze halo ona tinan 20. Hamutuk ho ita nia Bibi-Atan kontinua mehi ba ita nia Dioseze.
(Alice Gama)
