Roma – Papa Francisco, iha ninia enkontru semanál ho sarani sira iha Prasa S.Pedro, iha Vaticano, nafatin dedika ba katekeze. Iha tinan 2019, iha katekeze kona-ba orasaun Ami Amanno husi 29 Maiu 2019, katekeze kona-ba Livru “Apóstolu sira-nia Hahalok”.
Iha enkontru loron 9 Outubru nian, Amu-Papa aprezetna figura joven Saulo ne’ebé uluk persege sarani sira, depois koñesidu nu’udar Paulo, basá nia mak instrumentu ne’ebé Maromak hili atu haklaken Evanjellu ba nasaun sira.
Saulo hahú prende sarani sira, ho hanoin katak nia serví Na’i nia Lei. Nia ema ida “intolerante ba sira ne’ebé hanoin diferente husi nia, absolutiza identidade polítika ka relijioza rasik no redús ema seluk ba inimigu potensiál atu hafunu. Iha Sualo, relijiaun nakfilak tiha ba ideolojia: ideolojia relijioza, ideolojia sosiál, ideolojia polítika”.
Bainhira Kristu transform aona nia, Amu-Papa afirma, mak Paulo hanorin katak funu loloos la’ós kontra ema sira isin no raan nian, maibé kontra dominadór sira mundu nian no kontra ema espíritu aat sira ne’ebé inspira sira-nia asaun sira. Papa Francisco konvida saran ida-idak atu husu kona-n aninia fiar rasik:
“Ha’u bá hasoru ema seluk ka ha’u kontra ema seluk? Ha’u pertense ba Igreja universál (di’ak no aat, hotu) ka ha’u iha ideolojia seletiva ida? Ha’u adora Maromak ka ha’u adora fórmula dogmátika sira? Oinsá ha’u-nia vida relijioza? Fiar iha Maromak ne’ebé ha’u profesa halo ha’u sai belun ka funu-balu iha relasaun ho ema ne’ebé diferente husi ha’u?”.
S. Paulo simu batizmu ne’ebé marka, hanesan ba katóliku hotu, inísiu mori sfoun ida, akompaña ho modu foun komprensaun kona-ba Maromak. Liuhuis Batizmu, mane no feto sira la’ós ona funu-balu ba malu maibé maun no biin-alin iha Kristu, Amu-Papa reforsa.
Papa Francisco remata ninia katekeze hodi dehan katak iha Saulo “laran-manas persegidór Igreja nian nakfilak tiha iha laran-manas evanjelizadór ho kampaixaun”. Tanba ne’e, Amu-Papa husu ba sarani sira atu esperimenta domin ne’ebé Saulo esperimenta no simu husi Jezús, ida mesak ne’ebé bele nakfilak fuan fatuk nian iha fuan isin nian.
