Baucau – Maski festa gratidaun mundiál ba Madre Jerál Yvonne Reungoat fma liu tiha ona, domingu 1 Maiu, inísiu fulan Na’i-Feto nian mak komunidade edukativa Baucau bele hala’o festa ne’e hamutuk. Atu selebra festa Madre Jerál nian, Baucau husi kedas fulan Marsu, foti nu’udar empeñu: “Ami sei tau-matan ba ami nia kampu hodi moris tuir Laudato-Si nia hanorin liu husi eduka-an no eduka malu atu halo ambiénte sai moos no furak.” Ho modu konkretu atividade tolu ne’ebé hala’o mak: limpeza, resiklajen no kuda ai-horis, tanba rai ne’e lulik no ita keta halo aat no hafoer nia!
Iha festa ohin, foin-sa’e no labarik sira, hamutuk ho animadór/a no FMA sira hahú ho atividade espozisaun sira-nia produtu resiklajen. Grupu ida-idak hanesan oratorianu Teulale, oratorianu Diwake, grupu Infánsia/adolexénsia misionária no Laura halo expo ba ninia produtu sira halo durante semana hirak husi loron solenidade Páskua to’o oras-ne’e.
Molok reza hamutuk ba Madre Jerál, Ir Jacinta Gusmão fó motivasaun kona-ba selebra hamutuk loron ne’e no enkoraja sira atu kontinua aprende resiklajen atu bele halo expo iha fulan Outubru mai ne’e, iha okaziaun loron mundiál misaun nian. Nia mós husu sira atu dekór “ukun-fuan 10 moris sustentavel atu tau matan ba amibiente”. Atividade sira kontinua ho jogu-kuiz kona-ba Laudato Si no kona-ba Madre Jerál, animasaun dansa ruma no taka ho merenda hamutuk.
Ho modu simples maibé ita-nia objetivu mak kria espíritu família entre foin-sa’e no labarik sira, nune’e mós halo sira konxiente liután kona-ba Majistériu Amu-Papa Francisco nian hodi tau iha prátika.
(FMA Baucau)
