Dili – Iha loron 23 fulan Abril tinan 2017, Ir. Sebastiana Costa Soares no Ir. Esmeralda aprezenta kona-ba prevensaun no protesaun labarik ho menoridade ba ami komunidade S. José-Novisiadu husi tuku 10.30-12 dadersaan, hafoin iha tuku 3.00, lokraik ba iha sentru oratoriu rua: Ir. Sebastiana ba iha sentru Oratóriu S. João Paulo II no Ir. Esmeralda ba iha sentru Oratóriu Maria Auxiliadora Tasi Tolu.
Objetivu mak atu “fó orientasaun di’ak ba ami nia edukadór sira. Nune’e sira bele tulun labarik feto ka mane sira, ho hakarak promove ka hala’o esperiénsia edukativa ida-ne’ebé di’ak. Nune’e bele promove ho prosesu pozitivu no transparénsia ba sira-nia moris integrál, hodi forma aplikasaun Sistema Preventivu ida, atu bele proteje labarik sira”.
Iha enkontru ne’e Irmã sira hato’o kona-ba lei ka kódigu penál sira Timor Leste no “Insituto Filhas de Maria Auxiliadora (FMA) nian, ne’ebé mak iha ninia prinsipiu atu defende labarik sira-nia direitu hodi proteje sira. Proteje labarik sira iha prinsípiu sira ne’ebé ita tenke tuir, mak hanesan: “laiha toleránsia ho ema ne’ebé halo abuzu ba labarik sira iha idade menór; defende no proteje labarik sira-nia interese; garante seguransa no proteje labarik sira; fahe responsabilidade iha protesaun ba labarik sira; fó posibilidade ba ema hotu (inklui voluntáriu sira) atu fó resposta ne’ebé loos; iha konfiansa no iha relatóriu ba kestaun partikulár kona-ba protesaun labarik sira-nian” (kf brochure).
Família sira ne’ebé mak partisipa iha enkontru ida ne’e sira mós kontente tanba lei ida nu’udar matadalan ba sira atu eduka sira-nia oan sira, liuliu sira mós buka hodi atu tau iha pratika maski ne’e hola tempu atu aplika loloos.
Nune’e mós Irmã iha komunidade apresia tebetebes kona-ba lei ida ne’e, maske ne’e presiza tempu atu aplika iha ita-nia métodu edukativu nian. Maski nune’e komunidade no mós oratorianu sira agradese ba esforsu ne’ebé mak Irmã sira halo ba ita-nia Institutu nia di’ak.
(Lucia Pereira)
