Venilale – Projetu Komunidade Edukativa Santa Maria Mazzarello (Venilale) elabora kedas iha loron 7 Dezembru 2019, tuir kedas aprezentasaun programa inspetoriál husi Ir Alma Castagna, provinsiál FMA TIN no partisipa husi FMA, Profesór/a, reprezentante aman-inan no joven.
Iha inísiu tinan pastorál foun, ohin, Ir Jacinta Gusmão aprezenta programa ida-ne’e ba Komunidade Edukativa tomak, menus estudante tinan datoluk tanba hala’o hela estájiu. Hamutuk ho ne’e, iha mós aprezentasaun Estréia 2019: “«Atu Ha’u nia ksolok hela iha imi» (Jn 15,11). Santidade ba ó mós”. Komunidade mak eduka, no hodi iha hanoin ida de’it, fasil atu la’o hamutuk to’o ba ita-nia objetivu.
Projetu Komunidade Edukativa S. Maria Mazzarello
Inspetoria nia finalidade mak “valoriza Maromak nia prezensa iha moris loroloron, aprende arte akompañamentu no dixernimentu iha ida-idak nia vokasaun no tau atensaun ba ambiente dijitál”. Pasajen evanjélika Emaus nian mak gia hilin tolu komunidade nian.
Komunidade Edukativa Madre Mazzarello buka atu “Enkontru ho Maromak nia Liafuan, Sakramentu sira no Kreda nia dokumentu” bele nakfilak ita-nia moris. Asaun konkreta sira mak kontinua formasaun Litúrjika, selebra Eukaristia no Rekonsiliasaun fulan ida dala ida hamutuk; iha formasaun bíblika (Lectio Emaus hamutuk no Bible camp)no hakle’an dokumentu finál Sínodu Joven nian (trimestrál) no kontinua hakle’an Laudato Sí (Earth Day-Abríl).
Hilin daruak mak halo enkontru ho santu sira nu’udar fuan fuan sira husi karizma salezianu hodi aplika estréia 2019, koñese santu salezianu sira (buongiorno, novena/tríduu, rekreiu; formasaun iha grupu sira; camping kona-ba Madre Mazzarello nia moris atu selebra tinan 25 ETV nian iha 
Maiu) no tuir adolexente tempu ohin nian, Carlo Acutis nia ain-fatin.
Ba hilin datoluk mak halo empeñu konkretu iha asaun oioin liga ho dezafiu sira ohin nian: hanesan abitua moris moos no la soe foer arbiru no hadomi natureza (loroloron no nia tutun iha “Earth Day), asaun karitativa ba ema kiak, hahú husi karidade ho sira ne’ebé ita hasoru loroloron (kuarezma); no haklaken Maromak no buat di’ak iha ambiente dijitál (Juñu).
Estréia Reitór-Mor nian tinan ida-ne’e fó liután entuziazmu ba Komunidade Edukativa atu moris santidade loroloron nian, ne’ebé konsiste iha moris fiar, esperansa no karidade ida-idak nia estadu moris nian.
(JG)
