Dili – Depoizde tranzmisaun Kapítulu Jerál iha Timor-Leste (Indonesia seidauk), ohin, 4 Dezembru 2021, Irmán FMA balun halibur hamutuk iha prezensa fízika no online (Indonesia) atu haree kalendáriu no data ruma Provinsiál marka ba Janeiru-Agostu 2022. Enkontru ne’e mós ho objetivu atu rona aprezentasaun kona-ba tema Estréia 2022, programa plataforma Laudato Si’ nivel inspetoriál, Inspetoria nia partisipasaun iha projetu peskiza esplorativa nivel mundiál ba aniversáriu 150 Institutu FMA nian no avizu kona-ba knaar eh obediénsia sira. Hodi rona input sira-ne’e, liuliu Estréia no Laudato Si’ nia objetivu sira, komunidade bele tau iha konsiderasaun iha sira-nia programasaun ba fulan sira ne’ebé mai.
Ita seidauk bele halo programa tinan neen no tinan ida nian, tanba sei hein programa husi Konsellu Jerál. Iha fulan Janeiru to’o Marsu 2022, Konsellu Jerál sei halo plenum no sira-nia programasaun; hafoin mak Inspetoria sira bele halo sira-nian, bazeia ba programa Konsellu Jerál nian, no tuirmai komunidade sira, bazeia ba programa Inspetoria nian.
Ne’e duni, porenkuantu, komunidade sira sei halo sira-nia avaliasaun no haree saida mak sira la konsege halo no bele lori bá oin. Programasaun tinan 2021 liubá, la sees husi pontu tolu ne’ebé sai gia atu prepara ba KJ XXIV: komunidade vokasionál, komunidade sinodál no komunidade misionária-profétika.
Asaun urjente no obrigatória atu implementa mak deliberasaun Kapítulu nian: «Asembleia Kapitulár husik foin-sa’e sira, kiak sira no Rai nia hakilar interpela nia no hakotu lia atu envolve Institutu tomak iha dalan konkretu no permanente iha konversaun ba ekolojia integrál, hodi asume Laudato si nia objetivu hitu, iha rede no ho Sistema Preventivu nia estilu».
Asaun ne’e hahú hodi adere ba Papa Francisco nia konvite atu iha tinan hotu nia laran, ita hala’o objetivu hitu Laudato Si’ nian hanesan “hatán ba rai nia hakilar; hatán ba ema kiak nia hakilar; ekonomia ekolójika; hakohak estilu moris sustentavel; edukasaun ekolójika; espiritualidade ekolójika no resiliénsia no empowerment komunidade nian” (https://plataformadeacaolaudatosi.org/).
(JG)
