Dili, 12.03.2022, Enkontru dahuluk Juniores sira nian iha tinan 2022. Iha Irmán Juniores hamutuk nain 19 ne’ebé sei simu Formasaun husi Me. Jacinta Gusmão, FMA (Me. Tita) iha Noviciado- Komoro, hodi hare kona ba dokumentu “Liña gia kona ba FMA nia prezensa iha rede social”. Atu tulun Filhas de Maria Auxiliadora (FMA) sira sai konxiente liu tan ba uzu komunikasaun nian iha rede liuliu iha era digital ne’e.Molok Me. Tita aprezenta dokumentu ne’e ba Irmán Juniores sira, Me. Alma hato’o uluk lian makloke. Iha lian makloke ne’e, Madre dehan: “Iha formasaun ida ne’e atu kria mentalidade oinsa uza meio komunikasaun sira iha rede social. Formasaun kona ba prátika uza meio komunikasaun imi bele aprende mesak. FMA mak Edukadora Salesiana no ita iha responsabilidade ba uzu komunikasaun iha rede social atu hato’o informasaun sira ne’ebé bele tulun ema seluk atu buras iha moris, liuliu foin-sa’e sira.
Tuir mai Me. Tita hahú ho foin-sa’e nia lian ne’ebé husu ba FMA sira atu prezente iha rede social hanesan Maria ne’ebé prezente ho Jezús, Apóstolu sira iha senákulu to’o ba Lalehan. Nune’e ita nia prezensa mak prezensa Mariana katak ita mós p
rezente nafatin iha foin sa’e sira nia le’et atu akompaña no tulun sira. Kultura dijitál oferese potensialidade komunikativa bo’ot no efisiente . “foin-sa’e sira horik iha social network ho modu naturál, hodi halo sai sira nia patio baibain nian ba enkontru no interkámbiu, amizade agresaun nian entre pár sira. Nune’e Institutu FMA, husi inisiu, husik atu mudansa realidade nian, virajen kulturál sira, foin-sa’e sira-nia espetativa sira interpela nia. Valdocco no Mornese – edukomunikasaun Salesiana nia abut – fanun ita atu hateke ba realidade kontemporáneo ho abertura no konfiansa, responsabilidade no matan-moris. Maria Domenica Mazzarello no Saun Giovanni Bosco hatene kapta iha kommunikasaun <<dalan edukativu ba foin-sa’e sira nia formasaun integral>>. Sira husik hela marka permanente komunikasaun ida ne’ebé iha fundamentu iha Enkarnasaun no iha komunikasaun Trinitária. Komunikasaun ida ne’ebé Prezensa ida horik bá, iha-ne’ebé Maromak nia Espíritu nu’udar autór komunikasaun auténtika Aman nian mak hamosu. Nia mak imprimi Jezús nia oin iha ema ida-idak. Komunikasaun ida marka ho relasaun sira ba di’ak komún, ba abertura no ba kooperasaun atu hatán ba misaun 
edukomunikativa ne’ebé ninia hun mak Kristu nia fuan rasik. Hodi fo atensaun ba Maromak nia Espíritu prezente iha realidade Mornese nian, FMA sira simu bolun, iha ohin istória nian, atu dixerne Maromak nia lian iha konfuzaun sira nia lian no mensajen nian ne’ebé prezente no promove, hanesan Papa Francisco dehan “narasaun ida ne’ebé hatene hateke ba mundu no eventu sira ho ternura; ne’ebé haktuir ita-nia hola parte iha kompozisaun moris ida, ne’ebé revela kompozisaun sira fiu nian ne’ebé liga ho ema seluk sir aba malu”. FMA sira la’o nafatin iha dalan ho foin-sa’e sira, atenta ba sira-nia kontestu sira, liuliu, “ba foin-sa’e sira ne’ebé hahú dalan formasaun nian no dalabarak sira moris, esperiensia komplexa tamba ambivalensia iha valor no proposta sira ne’ebé habelar. Institutu FMA simu bolun atu enfrenta ho klareza mudansa sira ne’ebé inovasaun teknologia lori, entre sira-nia kategoria velosidade nian no relasaun nian iha insidénsia forte. Iha era dijitál ita halo parte iha mundu social fundamental ba misaun edukomunikativa Saleziana. “fasilidade asesu no utilizasaun meio sira komunikasaun nian no Rede Social nian interpela FMA nia sentidu responsabilidade nian, sobriedade nian, koerénsia moris nian. Iha espíritu da mihi animas coetera tolle nian, ita konsidera sira nu’udar oportunidade ba evanjelizasaun no misaun edukativa iha foin-sa’e sira nia le’et. Ida ne’e orienta atu atua nafatin iha fidelidade ba Evanjellu, ba karizma salezianu no kreda nia majisteriu, hodi hanoin katak, maski ita intervein ho títulu pesoál, ita reprezenta Institutu ne’ebé ita hola parte ba. Presiza tebes iha privacy no konfidensialidade no mós konxiente katak iha direitu no dever ba uzu komunikasaun sira iha tempo ida ne’e.
Ami hakarak hato’o ami nia agradese wain ba Maromak ne’ebé ohin haraik mai ami oportunidade diak atu aprende, haklean no loke liu tan ami nia hanoin ho formasaun furak ida ne’e. Ami mós agradese Institutu liuliu ba Inspetóoia ne’ebé hadomi tebes ami hodi nafatin fo tempo no espasu mai ami atu haburas no hariku-an ho ideia foun sira liuliu haklean Liña gia kona ba FMA nia prezensa iha rede social. Agradese wain ba Madre Inspetora, Me. Alma no Me. Tita ne’ebé fahe ona tempo no matenek mai ami FMA foin-sa’e sira atu hatene kona ba moris ho prudente iha era dijital ne’e. Ami agradese mós ba Madre Diretora husi ami ida-idak nia komunidade no Irmán sira ne’ebé subtitui hela ami nia knár atu ami bele tuir formasaun ne’e ho hakmatek. Ba di’ak hotu ne’ebé ami simu, ami husu Maromak atu kontinua haraik mai ita grasa no bensaun wain. Obrigada Barak.
(Irmán Juniora sira)
