Dili – Iha loron 7 de Outubro, ne’ebé santa Kreda dedika hodi hanoin fali ba loron Nain Feto do Rosário nian, Ispectoria TIN simu Aspirante nain haat: Abelita Babo, Fátima Martins, Domingas Pereira no Verónica da Cruz, ne’ebé ho hakarak rasik hatan tan “Sim” ba Maromak nia bolun iha Postulantado. Postulantadu mak tempu imediatu preparasaun nian ba novisiadu, atu hakle’an Maromak nia bolun.
Molok ne’e iha loron 2 – 4 Outubro, formanda sira ne’e halao sira nia retiro iha Baucau-Quelicai ne’ebé akompanha husi Ir. Alexandrina Pinto Fma, no pregadór ba sira iha retiro ne’e mak Pe. Silvano de Oliveira, SDB. Iha retiru loron tolu ne’e sai momentu ne’ebé tulun sira atu bele hakmatek hodi prepara an liu liu fuan atu bele hatán ho ksolok no fiar metin iha Maromak nia bolu, hanesan sira nia pasajen bíblika hateten: “Aten barani bá, Ha’u mak ne’e, keta ta’uk” (Ms 6,50). Iha retiro ne’e Pe. Silvano koalia liu kona ba ita ema nia vokasaun, ne’ebé hahú husi moris, Maromak mak fo moris mai ita iha mundu ida ne’e, no Nia kontinua bolu ita atu kontinua Ninia misaun salvasaun ida ne’e. Maromak bolu ita nu’udar religiosa katak atu ita horik nafatin ho Nia, iha Ninia liafuan sira, ita nia Ulun sira ne’ebé gia ita.
Aseitasaun postulante nian halo iha loron Nain Feto Rozáriu nian, ho selebrasaun badak maibé solene iha Komunidade Don Bosco–Balide, iha horas 16:00 TL, ne’ebé partisipa husi Irmán sira husi Komunidade S. José-Komoro, Divina Providensia no B. Eusebia Palomino no Irmán Novisa sira. Ir. Ermelinda Gomes Fma nu’udar vigária Provincial TIN nian, mak entrega medalla ba potulante doun na’in haat, basá iha momento ida ne’e labele partisipa husi Provinsial, Me. Paola Battagliola fma la iha, tamba oras ne’e partisipa hela Kapitulo Geral iha Italia. Maibé maske nune’e Nia haruka ninia auguri no lia-menon ba Postulante foun sira ne’e. iha selebrasaun ne’e Ir. Ermelinda hato’o mos auguriu no liu liu fo koragen ba sira atu buka hatan nafatin sim ba Maromak iha moris lorloron hanesan Maria no buka atu sai hanesan ita Inan ne’ebé hatan Sim iha momentu hotu, no buka atu tau laran metin iha Jezús ne’e bolu sira atu tuir Nia, hanesan Nia dehan ba Apóstolo sira: “Aten Brani ba, ha’u mak ne’e, keta ta’uk”. Sira nain haat sente kontente liu no agradese tebes ba Irmán sira ne’ebé durante ne’e tulun sira atu sai brani hatan ba Maromak dala ida tan iha sira nia vokasaun ida ne’e. Wainhira hotu selebrasaun kontinua ho festa hodi haksolok hamutuk molok Irmán sira fila ba idaidak nia komunidade. No iha kalan komunidade kontinua ho rekreiu festivo hodi komprimenta sira no lee mensajem husi Me. Paola Battagliola fma.
