Amu-Papa nia katekeze sira iha tempu hirak ne’e kona-ba Ukun-fuan sanulu no iha loron 10 Outubru nia komenta Ukun-fuan lima: keta oho. Abortu la’ós hahalok ida nein sivíl nein umanu, Amu-Papa dehan.
Sidade Vaticano – Papa Francisco halibur ho sarani lubuk ida no peregrinu sira iha Prasa S. Pedro ba audiénisa tradisionál kuarta-kuarta nian. “Ukun-fuan ida-ne’e, ho ninia formulasaun badak no kategórika, hanesan muralla defeza nian ba valór relasaun umana sira: valór moris nian”.
Desprezu
Ba Papa Francisco, bele dehan katak aat hotu ne’ebé eziste iha mundu nia rezumu mak desprezu ba moris. “Moris hetan agresaun husi funu sira, husi organizasaun sira ne’ebé esplora ema, husi espekulasaun sira kona-ba kriasaun no kultura soe nian, no husi sistema sira ne’ebé submete ezisténsia umana ba kálkulu sira oportunidade nian, enkuantu númeru eskandalozu ema sira nian moris iha estadu indignu ema nian”.
Abortu
Iha kontestu ne’e, Amu-Papa sita mós abortu, ne’ebé pratika iha inan nia knotak hodi salvaguarda direitu sira nia naran. “Oinsá mak bele sai terapéutiku, sivíl ka simplesmente umanu hahalok ida ne’ebé suprime moris inosente no la iha kbiit iha ninia natubun de’it? Justu atu hasai vida umana atu rezolve problema ida? Justu aluga oho-dór ida atu rezolve problema ida? ”
Akollimentu: dezafiu ba individualizmu
Violénsia no rejeisaun ba moris mai husi ta’uk, Papa Francisco afirma. “Akollimentu, defaktu, mak dezafiu ida ba individualizmu”. Bainhira aman sira deskobre katak oan mak maklorik defisiénsia nian, sira simu kedas konsellu atu interrompe isin-rua, bainhira loloos sira presiza prosimidade ne’ebé loos nian.
Labarik moras ida, idozu ida ka ema kiak sira, mak loloos, don ida Maromak nian, ne’ebé bele hasai egosentrizmu husi ha’u no halo ha’u sai boot iha domin. Iha pontu ida-ne’e, Amu-Papa agradese voluntáriu italianu barak, “voluntariadu forte liu ne’ebé ha’u hatene”.
Domin, sasukat auténtika ida mesak
Ema rejeita vida bainhira nia aposta iha ídolu sira mundu nian: osan, podér no susesu. “Ida-ne’e mak parámetru laloos sira atu avalia moris. Sasukat auténtika ida mesak mak domin, domin ne’ebé Maromak hodi hadomi!”
Amu-Papa esplika sentidu pozitivu “keta oho” katak, Maromak mak “domin-na’in moris nian”. Nia hadomi moris to’o saran nia Oan-Mane mesak, ne’ebé asume krús rejeisaun nian, frakeza nian, pobreza no terus nian.
“Iha labarik moras ida-idak, iha idozu fraku ida-idak, iha migrante dezesperadu ida, iha vida frajil no ameasada ida-idak, Kristu buka hela ita, buka ita-nia fuan atu hasai ksolok domin nian”.
