Maun no biin-alin sira, bondia!
Evanjellu ohin nian (kf Mt 23,1-12) nia ambiente mak iha loron ikus sira Jezús nia moris nian, iha Jerusalém; loron sira nkonu ho espetativa no mós tensaun sira. Husi parte ida Jezús dirije krítika maka’as ba farizeu siram husi parte seluk nia husik entrega importante sira ba sarani tempu hotu nian, nune’e mai ita mós.
Nia dehan ba ema lubun boot: «Eskriba no farizeu sira tur ha Moisés nia kadeira. Imi pratika no observa buat ne’ebé sira dehan». Ida-ne’e hakarak signifika katak sira iha autoridade atu hanorin buat nne’ebé tuir Maromak nia Lei. Maski nune’e, tuir kedas mai, Jezús hatutan: «maibé imi la halo tuir sira-nia obra, basá sira dehan maibé la halo» (v. 2-3). Maun no biin-alin sira, defeitu frekuente iha sira ne’ebé iha autoridade, autoridade sivíl nune’e mós ekeleziástika, mak atu ezije sasán husi ema seluk, justu nian mós, maibé sira rasik la tau iha prátika. Sira halo moris dupla/kaduak. Jezús dehan: «Sira futu naha todan no difisil atu lori no tau iha ema nia kabaas, maibé sira rasik la book nia ho liman-fuan ida» (v. 4). Atitude ida-ne’e mak ezersísiu aat ida autoridade nian, ne’ebé loloos tenek iha ninia forsa rasik husik ezemplu di’ak. Autoridade moris husi ezemplu di’ak, atu tulun ema seluk pratika buat nne’ebé justu no obrigatóriu, hodi fó apoiu ba sira iha provasaun sira ne’ebé hasoru iha dalan ba di’ak. Autoridade mak tulun ida, maibé se ezerse aat, hanehan, la husik ema buras no kria klima deskonfiansa no ostilidade nian no lori mós ba korrupsaun.
Jezús denunsia ho modu abertu komportamentu negativu ruma eskriba no farizeu ruma nian: «Sira kaan tur iha fatin uluk iha festa sira, tur iha oin iha sinagoga laran; sira hakarak ema kumprimenta sira iha prasa sira» (vv.6-7). Ida-ne’e mak tentasaun ida ne’ebé korresponde ho foti-an ema nian no la’ós fasil atu manán. Ne’e mak atitude moris ida iha aparénsia de’it.
Hafoin Jezús fó orden sira ba ninia eskolante sira: «Imi keta husik ema hanaran imi ‘Rabbi’, basá imi nia Mestre ida de’it, no imi hotu mesak maun alin. Keta husik ema hanaran imi ‘gia’, basá imi nia Gia ida de’it: Kristu. Imi ida ne’ebé boot liu sei sai imi nia atan» (vv. 8-11).
Ita Jezús nia eskolante sira labele buka títulu onra nian, autoridade nian eh supremasia nian. Ha’u dehan ba imi katak mai ha’u pesoalmente terus haree ema sira ne’ebé psikolojikamente moris halai tuir vaidade sira onra nian. Ita, Jezús nia eskolante sira labele halo ida-ne’e, tanba entre ita tenke iha atitude simples no fraternu. Ita hotu maun-alin no ita labele ho modu naran de’it domina ema seluk no hateke ba sira husi leten ba kraik. Lae. Ita hotu mesak maun-alin. Se ita simu kualidade sira husi Aman lalehan, ita tenke tau iha servisu ba maun-alin sira, no labele aproveita ida-ne’e ba ita-nia satisfasaun no interese pesoál sira. Ita labele konsidera ita-nia an superiór ba ema seluk sira; modéstia esensiál ba ezisténsia ida ne’ebé hakarak sai hanesan Jezús nia hanorin, ne’ebé fuan maus no haraik-an no mai la’ós atu ema serví maibé atu serví ema.
Atu Virjen Maria, «kriatura haraik-an no aas liu hotu» (Dante, Paradiso, XXXIII, 2), tulun ita, ho ninia intersesaun inan nian, atu hadook an husi orgullu no vaidade, no atu sai maus no dosil ba domin ne’ebé mai husi Maromak, atu ita-nia maun-alin nia servisu no ba sira-nia ksolok, ne’ebé ita-nia ksolok mós.
