Selebrasaun Axensaun Jezús nian sujere mai ita katak se ita hala’o moris iha domin no saran an, iha ita-nia dalan nia rohan, ita sei hetan vida definitiva, komuñaun ho Maromak. Jezús mós husik lia-menon ikus katak ita sarani sira mak tenke kontinua realiza Maromak nia projetu libertadór ba ema sira no ba mundu.
Evanjellu aprezenta enkontru finál Jezús moris-hi’as ho ninia dixípulu sira, iha foho ida Galileia nian. Komunidade dixípulu sira-nian, hadulas Jezús moris-hi’as, rekoñese Nia nu’udar Na’i, adora Nia no simu husi Nia misaun atu kontinua sai sasin “Reinu” nian iha mundu.
Iha leitura dahuluk, repete mensajen esensiál festa ne’e nian: Jezús, aprezenta tiha Aman nia projetu ba mundu, Nia tama iha vida definitiva komuñaun nian ho Maromak – vida hanesan ne’ebé Jezús nia dixípulu sira ne’ebé tuir nia “dalan” sei hetan. Dixípulu sira labele para hateke de’it ba lalehan, iha pasividade. Sira tenke sai ba iha ema sira nia leet, atu kontinua Jezús nia projetu.
Leitura daruak konvida dixípulu sira atu iha konxiénsia kona-ba esperansa moris komuñaun nian ho Maromak. Ne’e mak bolun ne’ebé sira simu, no sira tenke bá hasoru esperansa ne’e hodi kaer maun-alin sira nia liman – membru hanesan Kristu nia “isin” nian – no iha komuñaun ho Kristu, “ulun” ba “isin” ne’e. Kristu horik iha “isin, katak Igreja; no liuhusi Igreja mak Kristu ohin loron horik iha ema sira leet.
