Vizita breve Ir Assunta Sumiko Inoue
Dili – Ir Assunta Sumiko Inoue, Konselleira Vizitadora, ohin, 22 Agostu 2016, hahú ninia vizita breve iha Inspetoria FMA TIN. Ninia vizita hahú ho enkontru ho Konselleira Inspetoriál ho tema “Arte Governu no Animasaun nian”. Enkontru hahú ho orasaun-reflesaun ida ho liafuan sira husi Madre Jerál Ersilia Canta (Superiora husi 1969-1981) kona-ba tratu sira sai animadora ida tuir Madre Mazzarello nia ain-fatin atu bele fó fuan di’ak: “Una fruttuosa animazione” katak “Animasaun ida ne’ebé fó fuan”.
Tuir Madre Ersilia Canta, sai superiora tenke banati tuir Madre Mazzarello (MM) ninia karakterístika sira: Uluknanai, “ezerse knaar superiora nu’udar inan halo atu hotu-hotu sente nu’udar nia an nia mak preferida. Superiora sai modelu moris virtude hotu nian. Nia manda buat ne’ebé nia rasik mak ezemplu dahuluk. Hatene terus hamutuk, tolera, hatudu estima, pasiénsi, laran-di’ak, afetuoza, materna ne’ebé inpira konfiansa no domin; forte no mamar tempu hanesan; nia konfiansa iha Maromak; la lakon barani no haburas konfiansa iha Na’i; iha difikuldade hotu ninia hanoin dirije ba Maromak, ba Maria Auxiliadora no Jezús iha Sakramentu; nia la suporta de’it privasaun maibé hakarak privasaun; ba pobreza materiál nia tau hamutuk pobreza espirituál…; ninia obediénsia tuir loloos ida Kristu nian; nia haboot beleza kastidade nian no husu hotu-hotu atu kuda virtude ne’e, no ho nia matan, ho liafuan ida, ho hamnasa midar ida, nia inspira virtude ne’e”.
Nune’e, Ir Assunta hateten: “Sai FMA auténtika tenke reprodús MM nia liña espirituál”.
Hafoin, Irmán Assunta agradese ba konvite no ba servisu animasaun Inspetoria nia. Nia dehan “Ita la buka buat foun maibé ita bá fali orijen Institutu nian. Se ita aprofunda ita-nia karizma husi Mornese, ita hetan ita-nia espiritualidade. Nu’udar inspetoria ho MM nia naran, ita iha knaar atu hakle’an ninia espiritualidade”.
Ir Assunta hateten katak “Vizita breve ne’e nia objetivu mak koñesimentu dahuluk Inspetoria nian, realidade nian, hasoru foin-sa’e sira, ema signifikativu ruma”. Tanba Institutu ninia preokupasaun ida mak animasaun vokasionál, Ir Assunta sei reflete mós kona-ba tema ne’e ho Irmán sira.
Atu koñese realidade, Ir Assunta husu atu aprezenta realidade hodi husu sá loos dezafiu boot liu iha Inspetoria.
Ir Alma, provinsiál, aprezenta programasaun Inspetoria nian, hodi tuir KJ 23 nia dalan, Kreda universal no lokál nia moris hanesan dezafiu família nian, ekolojia no Tinan Mizerikórdia nune’e mós Tinan Vida Konsagrada nian. Iha dalan pós-kapitulár, uluknanai halo revizaun ba tradusaun Konstituisaun nian. Irmán Alma aprezenta mós servisu ne’ebé Irmán FMA sira halo iha Dioseze tolu no iha kolaborasaun ho Governu iha edukasaun no formasaun profisionál, no saúde.
Dezafiu ruma, uluknanai mak formasaun. Maski iha formasaun programada hanesan: diretora fulan 3 dala ida; juniora sira fulan-fulan, Irmán sira grupu idade oioin fulan 2 dala ida… maibé nafatin iha dezafiu iha vida loroloron nian atu tau iha prátika. Ezemplu formasaun litúrjika, maski halo iha nivel Dioseze tolu nian ba FMA hotu, sei susar atu tau iha prátika. Dezafiu seluk mak mentalidade projetuál, iha nivel komunidade no iha nivel Família Saleziana nian, basá ita sei moris iha kultura emerjénsia nian.
Hafoin Irmán konselleira ida-idak aprezenta sira-nia an no sira-nia knaar. Ir Esmeralda aprezenta programa Ámbitu Formasaun nian; Ir Cecilia asentua difikuldade atu iha materiál formasaun iha língua tetun.
Dezafiu ba Ámbitu Família Saleziana tuir ninia kordenadora, Ir Sebastiana, mak grupu Antigas Alunas, atu kria uniaun no federasaun.
Dezafiu Pastorál Juveníl mak oinsá eduka foin-sa’e sira ba projetu moris nian tuir Maromak nia planu.
Ámbitu Komunikasaun Sosiál hakarak hatán ba neesidade materiál formativu ba Irmán sira ne’ebé la hatene língua Fundadór/a nian no língua seluk. Aleinde ne’e, ba tinan ne’e, Komsos fó atensaun partikulár ba relasaun no komunikasaun interpesoál.
Ámbitu administrasaun nia dezafiu mak formasaun ba ekónoma lokál sira no formasaun ba kolaboradora na’in rua iha parte servisu estatál no servisu bankária. Pontu seluk mak dezafiu auto-sustentamentu komunidade nian no komuñaun soin nian no solidariedade entre Inspetoria.
Dezafiu ba Ámbitu Ad Gentes, tuir Ir Veronika Kusnadi, mak kria konxiénsia iha FMA sira kona-ba hola-parte ba Kongregasaun internasionál ida, ho atensaun ba mundu tomak. Ir Assunta haree ba total membru sira iha Inspetoria, nia hanoin katak ita iha esperansa no bele loke matan ba mundu.
Iha enkontru nia finál, Irmán Assunta husu atu identifika prioridade dezafiu nian no envolve diretora no irmán hotu iha servisu ba animasaun vokasionál. Madre Jerál fó ona pasu konkretu sira. Tema ne’e bele sai pontu Verifika nian, nune’e mós tema estilu animasaun no governu nian liuliu formasaun animadora komunidade nian. Sei eziste mentalidade piramidál, maski iha formasaun barak kona-ba koordenasaun ba komuñaun. Presiza muda neineik ho ita-nia moris. Konselleira sira mak komunidade ida; Irmán sira iha komunidade lokál hateke ba konselleira nu’udar modelu oinsá moris koordenasaun ba komuñaun ne’e.
