Papa Francisco iha Angelus, 25 Juñu 2017
Maun no biin-alin sira, bondia!
Iha Evanjellu ohin nian (kf Mt 10,26-33) Na’i Jezús, depoizde bolu no haruka ninia dixípulu sira iha misaun, nia hanorin sira no prepara sira atu enfrenta provasaun no persegisaun sira ne’ebé sira tenke hasoru. Bá misaun la’ós halo turizmu, no Jezús alerta ninia eskolante sira: “Imi sei hetan persegisaun sira”. Nune’e nia hanorin sira: «Imi keta ta’uk ema sira, basá laiha buat ida subar ne’ebé sei la hatudu sai […]. Buat ne’ebé ha’u hateten ba imi iha nakukun imi fó sai iha naroman. […] No imi keta ta’uk sira ne’ebé oho isin, maibé la iha kbiit atu oho klamar: sira-ne’e imi lalika ta’uk. Enviu ba misaun husi Jezús nia parte la garante susesu ba dixípulu sira, nune’e mós la salva sira husi frakasu no sofrimentu. Sira tenke tau iha konta posibilidade rejeisaun nian, nune’e mós ida persegisaun nian. Ida-ne’e halo ta’uk uitoan, maibé ne’e mak lia-loos.
Dixípulu simu bolun atu konforma nia moris rasik ba Kristu, ne’ebé ema sira persege, ne’ebé hatene saida mak rejeisaun, abandonu no mate iha krús. La eziste misaun iha marka hakmatek nian! Difiuldade sira, provasaun sira halo parte obra evanjelizasaun nian, no ita simu bolun atu hetan iha nia okaziaun atu verifika ita-nia fiar no ita-nia relasaun ho Jezús nia autentisidade. Ita tenke konsidera difikuldade sira-ne’e nu’udar posibilidade atu sai ba misionáriu ba beibeik no atu sai boot iha konfiansa ba Maromak, ita-nia Aman, ne’ebé la abandona ninia oan sira iha oras tempestade nian. Iha difikuldade sira sasin sarani nian iha mundu, Aman atensaun-na’in la haluha ita, maibé asiste nafatin ita ho lais. Tanba ne’e, iha Evanjellu ohin nian, ba dala tolu Jezús asegura ninia dixípulu sira hodi dehan: «Imi keta ta’uk!».
Iha ita-nia loron sira mós, maun no biin-alin sira, iha persegisaun hasoru sarani sira. Ita harohan ba ita-nia maun no biin-alin sira ne’ebé hetan persegisaun, no ita hahí Maromak tanba, maski nune’e, sira kontinua fó sasin ho aten-barani no fidelidade sira-nia fiar. Sira-nia ezemplu tulun ita atu keta laran rua-rua atu foti postura hodi hamriik ba Kristu, fó sasin ho barani iha situasaun sira loron ba loron nian, iha kontestu sira ne’ebé aparentemente hakmatek mós. Defaktu, forma ida provasaun nian bele mós ida auzénsia funu-balu no provasaun sira-nian. Aleinde hanesan «bibi iha asu-fuik sira nia leet», Na’i, iha ita-nia tempu mós, haruka ita nu’udar mahein iha ema sira ne’ebé lakohi hadeer husi lanu-todan mundu nian, ne’ebé ignora liafuan sira Lia-Loos Evanjellu nian, hodi harii sura nia an husi lia-loos sira temporáriu sira. No se ita la’o eh moris iha kontestu sira-ne’e no ita dehan Liafuan Evanjellu nian, buat ne’e inkomoda no sira sei la hateke di’ak mai ita.
Maibé iha buat sira-ne’e hotu Na’i kontinua dehan mai ita, hanesan nia dehan ba eskolante sira ninia tempu nian: “Imi keta ta’uk!”. Ita keta haluha liafuan ida-ne’e: sempre, bainhira ita iha provasaun ruma, persegisaun ruma, buat ruma ne’ebé halo ita terus, ita rona Jezús nia lian iha fuan: “Imi keta ta’uk! Keta ta’uk, bá oin! Ha’u hamutuk ho o”. Imi keta ta’uk ema sira ne’ebé zomba imi no trata aat imi, no imi keta ta’uk ema ne’ebé ignora imi eh “imi oin” fó onra ba imi maibé “iha kotuk” hafunu Evanjellu. Iha ema barak ne’ebé iha oin oin midar mai ita, maibé iha kotuk hafunu Evanjellu. Ita hotu koñese ida-ne’e. Jezús la husik ita mesak tanba ita folin liu ba Nia, tanba ne’e nia la husik ita mesak: ita ida-idak folin liu ba Jezús, no Nia akompaña ita.
Virjen Maria, modelu adezaun umilde no korajoza ba Maromak nia Liafuan, tulun ita atu komprende katak iha sasin fiar nian la konta susesu sira, maibé fidelidade, fidelidade ba Kristu, hodi rekoñese iha sirkunstánsia hotu, ida problemátika liu mós, don folin boot atu sai ninia dixípulu misonáriu sira.
