Quelicai – Irmán FMA sira bá tulun parókia S.Teresinha do Menino Jesus (Quelicai) husi loron 21-30 Marsu. Komunidade rua ne’ebé bá ajuda mak komunidade S. Teresa d’Avila (Baucau) no komunidade S. Maria Mazzarello (Venilale).
Husi komunidade M. Mazzarello, Ir Santina Guterres no Ir Maria Natalina mak bá durante loron 4 nia laran, husi 27 to’o 30. Esperiénsia ne’e, tuir Ir Maria Natalina mak “esperiénsia furak, tanba sai husi ita-nia fatin rasik hodi bá iha fatin-fatin ne’ebé amlulik no relijiozu sira seidauk iha, hodi la’o ain”. Fatin sira mak: Lalu-Liu, Laku-Liu, Uaitame, Sara-ida, Ruta no Laumana.
Iha Quelicai sentru, iha misionáriu Pe. Jojo San Juan SDB nu’udar pároku, mesak ho diákonu ida ne’ebé tau matan ba orfanatu. Tanba ne’e nia presiza Irmán sira nia tulun atu prepara sarani sira ho retiru ba festa Páskua. Tema pregasaun retiru nian mak Amu-Papa nia Mensajen ba Kuarezma 2017: “Ema seluk mak prezente ida, Maromak nia Liafuan mak prezente ida”.
Irmán sira apresia tebes ho sarani sira ne’ebé hela iha área rurál, nakonu ho laran-manas atu rona Maromak nia Liafuan, hahú husi labarik sira to’o ferik-katuas sira. Sarani sira-ne’e maioria la ko’alia lia-tetun, maibé lia-makasae de’it, no presiza tradusaun.
Irmán sira mós, bainhira bá aldeia sira, nafatin iha ema ida akompaña no nu’udar Timor-oan, ne’ebé iha kultura ospitalidade, sira sempre atende didi’ak bainaka sira.
Misaun Quelicai misaun ne’ebé sarani sira nia fiar manas, no ida-ne’e tanba ema sira-nia simplisidade atu loke an ba Na’i nia Espíritu, maibé mós, tanba Amu pároku ne’ebé laran manas atu haklaken Maromak nia Evanjellu hodi envolve leigu sira no, bainhira presiza, Irmán sira husi fatin seluk.
(Maria Natalina da Costa – Redasaun)
