Papa Francisco nia lia-menon iha loron Páskua Anju sira-nian (Segunda Oitava Páskua nian – 10/4-2023)
Maun no biin-alin sira, ‘ buongiorno’!
Ohin Evanjellu halo ita moris fali feto sira-nia enkontru ho Jezús moris-hi’as iha dadeer Páskua nian. Nia fó hanoin mai ita katak, feto dixípula sira, mak uluk liu atu haree Nia no hasoru Nia.
Ita bele husu: tanba sá sira? Ba motivu simples ida: tanba sira mak uluk liu atu bá rate. Nu’udar dixípulu hotu, sira mós terus ba oinsá Jezús nia eventu remata.; maibé oinseluk husi sira seluk, sira la hela iha uma paralizada tanba laran-triste no ta’uk: dadeersaan nakukun, bainhira loron-matan sa’e, sira ba fó onra ba Jezús nia isin hodi lori mina morin sira. Rate kadeadu metin no sira husu ba malu sé mak sei hasai fatuk, todan nune’e (kf Mc 16,1-3). Maibé sira-nia hakaran atu kumpri jestu domin nian ne’e manán buat hotu. Sira la dezanima, sira sai husi sira-nia laran-ta’uk no sira-nia laran-taridu. Ne’e mak dalan atu hasoru Na’i Moris-Hi’as: sai husi ita-nia laran-taridu sira.
Ita ba haree hikas sena ne’ebé Evanjellu haktuir: feto sira to’o, haree rate mamuk no, «ho ta’uk no ksolok boot», halai – testu dehan – «atu fó hatene ba ninia dixípulu sira» (Mt 28,8). Iha duni momentu sira bá fó anúnsiu ida-ne’e mak Jezús mai hasoru sira. Ita observa didi’ak ida-ne’e: Jezús hasoru sira bainhira sira bá haklaken. Furak buat ne’e: Jezús hasoru sira bainhira sira bá haklaken. Bainhira ita haklaken Na’i, Na’i mai hasoru ita. Dalaruma ita hanoin katak modu atu besik ba Maromak mak hakohak metin Nia mai ita; basá depois, se ita hahú esplika no ko’alia, sei mai julgamentu sira, krítika sira, karik ita la hatene hatán pergunta ruma ka provokasaun sira, nune’e di’ak liu la ko’alia no taka an: lae, ida-ne’e la di’ak! Na’i mai bainhira ita haklaken Nia. Ó sempre hetan Na’i iha dalan anúnsiu nian. Ó haklaken Na’i no ó sei hetan Nia. Buka Na’i no ó sei hetan Nia. Nafatin iha dalan, ida-ne’e mak feto sira hanorin: ita hasoru Jezús hodi fó sasin kona-ba Nia. Ita tau ida-ne’e iha fuan: Ita hasoru Jezús hodi fó sasin kona-ba Nia.
Ita halo ezemplu ida. Akontese katak dalaruma ita simu notísia furak ida, hanesan porezemplu bebé ida moris. Nune’e, buat primeiru ne’ebé ita halo mak partilla anúnsiu ksolok ida-ne’e ho belun sira: “ó hatene, ha’u iha oan-mane ida… nia oin furak”! No, hodi konta ida-ne’e, ita repete mós mai ita-nia an rasik no halo nia moris fali liután iha ita. Ida-ne’e akontese ba notísia furak ida, loroloron nian ka loron importante ruma, akontese liután ba Jezús, ne’ebé la’ós de’it notísia furak ida, no la’ós mós notísia furak liu moris nian, lae, maibé Nia mak moris ne’e rasik, Nia mak «moris-hi’as no moris» (Jo 11,25). Kadavés ne’ebé ita haklaken Nia, la’ós halo propaganda ka proselitizmu – ida-ne’e lae: haklaken buat ida, halo propaganda no proselitizmu buat seluk. Ema sarani haklaken, ema ne’ebé iha objetivu seluk halo proselitizmu no ida-ne’e la loos – kadavés ne’ebé ita haklaken, Na’i mai hasoru ita. Nia mai ho respeitu no domin, hanesan don furak liu atu partilla. Jezús horik liután iha ita kadavés ne’ebé ita haklaken Nia.
Ita hanoin dala ida tan ba feto sira Evanjellu nian: iha fatuk kadeadu metin no maski nune’e sira bá rate; iha sidade tomak ne’ebé haree Jezús iha krús no maski nune’e sira bá iha sidade atu haklaken katak Nia moris. Maun no biin-alin sira, bainhira ita hasoru Jezús, la iha obstákulu ida ne’ebé bele hapara ita atu haklaken Nia. Se ita rai mai ita Ninia ksolok, ne’e karik tanba ita ladauk hasoru loloos Nia.
Maun-alin, biin-alin sira, iha feto sira nia esperiénsia nia oin ita husu ba an rasik: dehan mai ha’u, bainhira mak dala ikus ó fó sasin kona-ba Jezús? Bainhira mak dala ikus ha’u fó sasin kona-ba Jezús? Ohin, ha’u halo saida atu ema sira ne’ebé ha’u hasoru simu ksolok anúnsiu nian kona-ba Nia? No tan: ema ruma bele dehan: ema ne’e hakmatek, haksolok, di’ak tanba Nia hasoru Jezús? Bele dehan ida-ne’e mai ita?
Ita husu Na’i-Feto atu tulun ita sai haklaken-na’in haksolok Evanjellu nian.
