Sidade Vaticano- Komuñaun mak tema katekeze Papa Francisco nian iha kuarta 21 Marsu. Amu-Papa halo analojia badak ida entre primavera ― ne’ebé hahú ona iha kontinente europeu – no fiar saeani, ne’ebé tenke fó funan no tau abut.
“Maibé saida mak akontese iha primavera? Ai-oan sira fó funan, ai-hun sira fó funan. Ha’u halo pergunta ruma ba imi. Ai-hun ida eh ai-oan ida moras, fó funan di’ak se sira moras? Lae! Ai-hun ida, ai-oan ida ne’ebé udan la rega eha la rega artifisialmente, bele fó funan di’ak? Lae. No ai-hun ida no ai-oan ida iha ne’ebé hasai tiha sira-nia abut eh la iha abut, bele fó funan? Lae. Maibé lahó abut bele fó funan? Lae! No ida-ne’e mensajen ida: vida sarani tenke sai vida ida ne’ebé fó funan ho obra sira akridade nian, hodi halo buat di’ak”, Amu-Papa hateten.
No atu vida sarani fó funan, ita tenke sai atenta ba Jezús nia hanorin sira, ita tenke rega ita-nia vida ho Ninia prinsípiu sira. Nune’e de’it mak ita bele evolui. “Se ó la rega ó-nia moris ho orasaun no sakramentu sira, ó iha ai-funa sarani? Lae! Tanba orasaun no sakramentu sira rega abut sira no ita-nia moris fó funan. Ha’u hakarak atu primavera ida-ne’e sai ba imi primavera ho funan, nune’e mós Páskua ho funan, Funan ho hahalok di’ak sira, ho virtude, hodi halo di’ak ba ema seluk”, Amu-Papa fó hanoin.
Papa Francisco mós fó hanoin katak Komuñaun bele sai enkontru ida ho Kristu. Komunga, iha Pedro nia Susesór nia liafuan sira, signifika hakbesik an liután ba Maromak nia Oan-Mane. “Kadavez ita komunga, ita sai hanesan liután ho Jezús, ita nakfilak liután iha Jezús. Hanesan paun no tua konverte ba Na’i nia Isin no Raan, ema sira ne’ebé simu ho fiar sai nakfilak iha Eukaristia moris nian”, nia afirma.
