Ho tinan sanulu-resin-tolu tama iha koléjiu FMA nian
María Romero Meneses moris iha Granada, Nicarágua loron 13 Janeiru 1902 iha família riku liu nia laran. Nia aman, ministru finansa nian iha governu republikanu, laran-luak liu ho ema kiak sira. Husi ki’ik kedas María aprende katak sá karidade konkreta maski iha difikuldade laran mós. Ninia família iha mehi boot ba nia: nia estuda múzika, piano no violinu.
Ho tinan sanulu-resin-tolu nia tama iha koléjiu FMA nian, iha-ne’ebé nia hatudu nia an nu’udar ema disponível no haksolok. Nia sente katak karizma Dono Bosco nian moris ka kria ba nia nune’e ho tinan 18 niahahú dalan atu sai FMA. Iha novisiadu nia hanorin múzika no servisu iha oratóriu festivu, no iha ne’ebá bele kaer ho liman rasik ba dala uluk menina sira nia kakiak/pobreza.
Iha tinan 1923 nia halo primeira profisaun. Halo tiha votus perpétua, iha 1931 nia simu knar atu bá San José iha Costa Rica, ne’ebé sai ninia rai-inan/patria daruak ba tinan 46 nia laran. Nia simu knaar atu hanorin iha koléjiu foin-sa’e feto riku sira-nian. Maibé nia buka liuliu “labarik kiak no abandonadu sira, hanesan Don Bosco halo. Ho sensibilidade evanjélika no ekleziál boot nia forma ninia foin-sa’e feto aluna sira atu sai misioneritas, iha adeia sira besik kapitál entre labarik no família kiak sira. Sira bá iha ema kiak sira nia baraka, tulun atu hamoos, lori hahán no hatais ne’ebé irmán María halibur no halo katekeze. Nia harii oratóriu festivu ba labarik kiak sira: hahú ho 36!
Maria Ausiliadora, ne’ebé nia bolu nu ’u dar ninia Liurai-Feto, halo atu nia simu oferta barak, atu fó apoiu ba ninia obra sira. Hodi obra voluntáriu médiku espesialista sira nian nia konsege hamoris poliklínika ida ho espesialista oioin, atu garante asisténsia médika no farmaséutika; iha fatin hein nian molok ba konsulta iha sala sira ba katekeze no alfabetizasaun no kapela ida atu reza.
Sidade ki’ik Maria Ausiliadora nian, kreda ida…
Ba família sira uma laek nia halo atu sira bele hetan uma loos nian, sidade oan sira Maria Ausiliadora nian: obra ida ne’ebé sei kontinua ohin loron tanba kolaboradór sira-nia interese liu husi Asosiasun leigu Asayne nian (Asociación Ayuda a los Necesitados).
Atu habelar devosaun saleziana ba Maria Ausiliadora nia halo atu harii kreda id a ba Maria Ausiliadora iha sentru San José nian. Iha realidade nia hala’o obra boboot hodi ninia fiar no ema riku sira-nia kolaborasaun ne’ebé nia konsege manán ba kauza ne’e, depoizde simu efeitu husi devosaun mariana. Hanesan Don Bosco no Madre Mazzarello nia mak kontemplativa iha asaun.
Nu’udar Ema ho raan artista nian, Maria uza meiu hotu atu esprime ninia domin ba Maromak: toka múzika, kanta, hakerek poezia no… kuda ai-funan. Rai-hun mutin de’it nia dala ruma ba tur ho órgaun no hananu knananuk napoletanu ne’ebé nia gosta liu: O sole mio (Oh ha’u-nia loron), atu fó onra ba ninia Loron, Maromak moris nian. Ninia uniaun ho Maromak halo nia sai konselleira espirituál ne’ebé ema barak buka. Husi ninia “Escritos Espirituales” imprime tiha ona volume barak.
Nia mate tanba infartu (atake fuan nian) iha loron 7 Jullu 1977 iha tasi-ibun, hanesan nia rasik hakarak. Governu Costa Rica nian deklara nia nu’udar sidadaun onra nasaun nian. Nia isin-mate hakoi iha San José, Costa Rica, iha obra boot ne’ebé nia funda “Casa de la Virgen” no “Obra Social”.
João Paulo II beatifika nia iha loron 14 Abríl 2002. FMA sira selebra nia memória iha loron 7 Jullu.
Pensamentu ruma Ir. Maria Romero nian
“Tau ó-nia liman, ha’u-nia Inan, tau bá molok ha’u-nian”.
“¡Oh, Jezús! Hanorin ha’u atu ko’alia, serbisu no moris de’it iha Ita-nia domin no tanba Ita-nia domin”.
“Relijiaun mak siénsia lialoos nian, siénsia divina, ne’ebé lori it aba koñesimentu no ba domin Maromak nian. Nu’udar sarani, ita iha obrigasaun atu estuda nia atu bele mantein lakan ita-nia lámpada Fiar nian”.
“Orasaun ba klamar hanesan ár ba pulamaun sira”.
“Asaun divina lakohi hetan obstákulu ida husi buat ida iha kriatura. Buat hotu serve, buat hotu util no oportunu, buat ida la vale lahó nia, no buat la vale sai buat hotu iha nia”.
“¡ Furak tebes bele mate iha tasi oin! Ha’u bele haree Maromak iha gota ida-idak”.
