BRONISLAO MARKIEWICZ
30 Janeiru
Bronislao Markiewicz moris iha Jullu 1842 iha Pruchnik, Polonia, atuál arkidioseze Przemyśl igreja latina nian, oan daneen husi oan na’in sanulu-resin-ida João Markiewicz, prefeitu sidade nian, no Mariana Gryziecka nia oan. Nia simi, iha família, formasaun relijioza sólida. Maski nune’e, ikusmai, iha períodu estudu jináziu nian iha Przemyśl nia esperimenta laran rua-rua iha fiar, tanba ambiente anti-relijiozu iha eskola nia estuda bá. Nia konsege supera situasaun ne’e hodi manán hikasfali ninia hakmate no dame interiór.
Depoizde baxareladu, joven Bronislau, tanba sente Maromak nia bolun ba saserdósiu, iha 1863 nia tama iha Semináriu-Maiór Przemyśl nian. Kompleta tiha itineráriu regulár estudu sira-nian, nia simu ordenasaun saserdotál iha 15 Setembru 1867. Depoizde tinan neen servisu pastorál nian nu’udar vigáriu parokiál iha parókia Harta nian no iha katedrál Przemyśl nian, tanba nia hakarak prepara an liután atu serbisu ba juventude, nia estuda tan ba tinan rua, pedagojia, filozofia no istória iha universidade sira Leópolis no Cracóvia nian. Iha 1875 nia hetan nomeasaun nu’udar pároku Gać nian no iha 1877 Blażowa. Iha 1882 nia simu knaar atu hanorin Teolojia pastorál iha Semináriu-Maiór Przemyśl nian.
Tanba sente bolun ba vida relijioza, iha novembru 1885 nia bá Itália no tama iha Salezianu sira, haksolok bele hasoru Don Bosco no iha nia liman nia halo votu relijiozu sira iha 25 Marsu 1887. Nu’udar Saleziani nia okupa kargu oioin ne’ebé superiór sira konfia ba nia no buka hala’o ho dedikasaun no laran-manas. Tanba austeridade moris nnian no klima ne’ebé la hanesan, iha 1889 Bronislau moras tuberkuloze grave, to’o ema hanoin nia besik atu mate. DI’ak fali husi nia moras, nia halo konvelexénsia iha Itália to’o 23 Marsu 1892 bainhira, ho lisensa superiór sira-nian, nia filafali ba Polonia, hodi asume kargu pároku nian iha Miejsce Piastowe, iha ninia dioseje orijen nian, Przemyśl.
Aleinde atividade parokiál ordinária, Bronislau Markiewicz dedika an, iha espíritu Don Bosco nian, ba juventude kiak no oan-kiak nia formasaun. Tanba ne’e mak nia loke iha Miejsce Piastowe, institutu ida ne’ebé oferese apoiu materiál no espirituál ba edukandu sira, hodi prepara sira ba moris ho formasaun profisionál iha kursu ne’ebé institutu refere loke. Iha 1897 nia deside funda, ba finalidade ida-ne’e, Kongregasaun relijioza rua ne’ebé hetan inspirasaun husi Don Bosco nia espiritualidade, hodi adapta ninia regra sira tuir espesifisidade karizma rasik. Simu hikas fali nia entre kleru Przemyśl, padre Markiewicz kontinua atividade pároku nian no diretór Institutu nian ne’ebé nia fó nu’udar programa Temperansa no Serbisu (1898). Ni abuka hetan aprovasaun nu’udar Kongregasaun relijioza, hodi Saun Miguel Arkanju nia protesaun, ho sanak maskulinu no seluk femininu. Aprovasaun mai tinan ruma depoizde ninia mate, iha 1921 ba Kongregasaun Saun Miguel Arkanju (“Padre Miguelita” sira) , no iha 1928 ba Kongregasaun Irmán Saun Miguel Arkanju nian (“Irmán Miguelita” sira”).
Padre Bronislau kontinua, nafatin ho aprovasaun no bensaun bispu nian, S. José Sebastião Pelczar, ninia atividade formasaun nian ba foin-sa’e no labarik sira. Oan-kiak no abandonadu sira, hodi hetan ajuda husi kolaboradór responsavel sira iha-ne’ebé nia rasik kontribui ba sira-nia formasaub. Iha Miejsce Piastowe, nia oferese uma no formasaun ba foin-sa’e atus ba atus, hodi saran an tomak ba sira. Tanba nia hakarak halo favór barak liután ba sira, iha Agostu 1903, padre Markiewcz loke uma foun ida iha Pawiikowice, besik Cracóvia, iha-ne’ebé oan-kiak liu 400 hetan uma no formasaun espirituál no profisionál.
Dedikasaun totál ba foin-sa’e sira, haluha an rasik eróika no serbisu boot ne’ebé nia halo, halakon padre Markiewicz nia forsa sira, ameasa maka’as ba ninia saude ne’ebé ladún di’ak ona ho moras si a nia hetan iha Itália. Buat ne’e hotu lori nia lalais de’it ba ninia peregrinasaun iha rai ne’e ninia rohan, ne’ebé akontese iha 29 Janeiru 1912.
Beatu Bronislau Markiewicz iha domin boot ba Na’i no ba maun-alin sira, liuliu sira ne’ebé kiak liu, ema despreza, abandona no oan-kiak, hodi dedika nia moris tomak ba sira. Nia moris kle’an ho hakaran boot atu oferese ba foin-sa’e sira domin ne’ebé sira kuran liu. Hakaran kle’an ne’e nia espresa ho ninia liafuan sira-ne’e: “Ha’u hakarak halibur joven abandonadu tokon ba tokon, husi povu hotu, fó han sira gratuitamente no fó hatais ba sira-nia isin no espíritu”. To’o mate, nia fiél ba imperativu domin nian ida-ne’e, liga ho ninia opsaun korajoza ba kiak sira, aseita ho modu eróiku konsekuénsia hotu mai husi opsaun sira-ne’e.
Papa Bento XVI foti nia ba Beatu iha 19 Juñu 2005.
