29 Maiu
Estuda iha eskola Salezianu sira-nian iha Oswiecim (Auschwitz)
Józef Kowalski moris iha Siedliska besik Rzeszów, Polónia iha 13 Marsu 1911, husi Wojciech no Zofia Borowiec. Nia mak oan dahituk husi oan nain sia. Nia aman-inan sira, pratikante katóliku, mak to’os-na’in sira.
Depoizde eskola primária, sira matríkula nia iha Koléjiu Salezianu iha Oswiecim (Auschwitz). Józef destaka an iha ninia empeñu ba estudu no servisu no ninia ksolok sinseru. Nia tama iha sosiedade Imakulada Konseisaun no Asosiasaun Misionária, no ikusmai sai prezidente.
Nia hadomi karizma salezianu no ninia FUndadór, iha-ne’ebé nia moris tuir nia ezemplu iha buat hotu: empeñu iha animasaun ksolok nian durante feriadu relijiozu no sivíl sira, nia prezensa apostólika iha nia maluk sira leet, no ho modu partikulár, fó primadu ba vida espirituál.
Devosaun ba Maria Auxiliadora no Eukaristia
Bainhira foin-sa’e, nia hahú hakerek ninia diáriu, ne’ebé tranzmiti mai ita devosaun ba Maria Auxiliadora no ba Eukaristia: «Oh ha’u-ni ainan – nia hakerek – ha’u tenke sai santu basá ida-ne’e mak ha’u-nia destinu. Oh Jezús, ha’u oferese ba Ita ha’u-nia fuan kiak […]. Ha’o atu ha’u nunka hadook an husu Ita no to’o mate ha’u fiél nafatin: ha’u hakarak mate liufali ofende Ita, maski ho salan ki’ik-oan ida. Ha’u tenke sai salezianu sagradu ida, hanesan ha’u-nia aman Don Bosco”.
Profisaun nu’udar Salezianu, ordenasaun
Nia halo ninia profisaun temporária iha 1928 iha Czerwinsk no simu ninia ordenasaun saserdotál iha 29 Maiu iha 1938 iha Cracóvia. Nia simu nomeasaun nu’udar sekretáriu provinsiál. Nia tau matan ba koru ida joven sira-nian iha parókia no tau matan ba foin-sa’e sira ne’ebé difisil liu.
Gestapo kaer Don Kowalski no salezianu na’in 11 seluk
Iha 1939 Polónia hetan invazaun, maibé salezianu sira kontinua sira-nia serbisu edukasionál. Ne’e mak razaun prinsipál ba detensaun dramátika iha 23 Maiu 1941: Gestapo kaer Don Kowalski no Salezianu na’in 11 seluk ne’ebé serbisu iha Cracóvia. Foufoun sira hatam iha prizaun Montelupich nian iha sidade hanesan; husi ne’ebá, sira muda nia ba kampu konsentrasaun Auschwitz nian iha 26 Juñu, hodi simu númeru 17.350. Iha kampu konsentrasaun, nia dedika an iha segredu laran ba apostoladu: nia konfesa, selebra missa, reza rozáriu, realiza konferénsia subsubar, inklu mós kona-ba Don Bosco, hodi reforsa dezeju atu luta ba sobrevivénsia iha ninia maluk sira prizaun nian.
Martíriu
Nia hetan terus, asédiu no umillasaun. Bainhira sira Gestapo deskobre nia ho rozáriu iha liman, nia lakohi atu sama rozáriu, nune’e aselera ninia martíriu, ne’ebé akontese iha Auschwitz iha 4 Jullu 1942. Sira soe nia isin uluknanai ita tanki foer sentina nian, hafoin sunu nia iha krematóriu akampamentu nian.
Ninia maluk sira aldeia nian hahú venera ninia memória, ho fiar katak ninia sakrifísiu fó fuan vokasaun nian iha Polónia. Papa S. João Paulo II mós iha opiniaun hanesan no iha interese ba mártir sira barak Polónia nian. Ikusmai, nia beatifika sira iha Warsaw iha 13 Juñu 1999.
Dekretu martíriu nian publika iha 26 Marsu 1999; no Papa S. João Paulo II beatifika Joséf Kowalksi no nia maluk sira iha 13 Juñu 1999.
