Venilale – Parókia Sagrado Coração de Jesus organiza “Bible Camp” ida ba joven sira iha Venilale husi loron 29-30 Setembru.
Hanesan ita hatene, fulan Setembru mak fulan Bíblia nian. Bíblia mak Livru Maromak nia Liafuan nian. Maromak nia Liafuan ba kristaun ida mak “roman”, kritériu ba ninia “ain-fatin” sira. Kampu ne’e liga mós ba tema Sínodu Bispu sira-nian iha fulan Outubru kona-ba joven, fiar no dixernimentu vokasionál. No nu’udar Kreda lokál, ita hakarak tulun joven sira atu valoriza liután Bíblia ne’ebé halo ita koñese Maromak, uluknanai liuhusi Povu Israel nia istória no finalmente liuhusi Ninia Oan-Mane.
Ba ne’e mak organiza “campo bíblico” ho tema “Maromak nia istória domin nian ho nia povu”, ba foin-sa’e sira husi escola sira, husi asosiasaun sira no husi sentru pastorál ka estasaun misionária. Foin-sa’e sira no katekista adultu ruma, hamutuk na’in 80, mai hodi halo camp overnight no aprende kona-ba Bíblia, Istória Salvasaun no personajen sira iha Maromak nia istória ho ema. Ema ka personajen bíbliku sira ne’ebé foin-sa’e sira fahe ba grupu hitu hakle’an mak: Abrãao, Moisés, David, Isaías, Amós, João Baptista no Maria. Bible Camp hahú ho orasaun hamutuk no entronizasaun ba “Evangeliarium”. Hotu tiha orasaun, hahú kedas ho tópiku jerál: Koñese Bíblia no Istória Salvasaun ne’ebé Ir Jacinta Gusmão mak fasilita. Ba grupu ida-idak iha Irmán responsavel. No Irmán sira-ne’e mak Ir Áurea, Ir Fabiola, Ir Yasintha, Ir Olga, Ir Cesarina, Ir Joaquina no Ir Alexandrina.
Atividade sira halo ho modu atu iha partisipasaun ativa: liuhusi jogu, kuiz, dramatizasaun, poezia, leitura no reflesaun, foin-sa’e sira buka koñese Istória Salvasaun haktuir iha Bíblia. Grupu ida-idak hakle’an, hafoin sira fahe fali ba grupu seluk. Iha kalan sira halo orasaun ho “ahi-klobor”. Iha parte dahuluk sira haree uluk oinsá sira-nia moris fiar nian, ho oportunidade ba hakbesik Sakramentu Peniténisa no Konfiaaun. Hafoin sira fahe sira-nia orasaun ho modu kriativu.
Loron daruak, mak loron misionariedade. Depoizde orasaun ba mandatu misionáriu, grupu hotu haruka ninia reprezentante ba grupu sira seluk atu fahe sira-nia deskoberta kona-ba Maromak nia Liafuan liuhusi personajen ne’ebé sira hakle’an.
Iha avaliasaun, foin-sa’e sira fahe katak esperiénsia ne’e hariku sira. Buat hotu tulun sira atu bele aprende tan no hadomi Maromak nia Liafuan. Sira husu atu oferese atividade ne’e ba foin-sa’e barak liután, atu halo tinan-tinan, no atu sai eskola ida Bíblia nian nune’e sira bele koñese lután Maromak ninia Liafuan.
Oportunu tebes katak iha loron ikus nian mak loron S. Jerónimo nian, biblista santu boot ne’ebé hateten katak “ignoránsia Eskritura nian mak ignoránsia Kristu nian”… Nune’e konvite atu loke, lee, reflete no moris tuir Maromak nia Liafuan.
