Roma – “Kreda, Kristu nia Isin” mak tema katekeze Papa Francisco nian, iha kuarta,22 ohin. Amu-Papa ko’alia kona-ba komuãun no domin ne’ebé marka komunidade fiar nian, hodi resalta oinsá, síume/laran-moras no inkomprensaun hamosu divizaun iha Kreda.
Amu-Papa define Kreda nu’udar “obra-prima Espíritu nian”, ne’ebé infunde iha ema ida-idak moris foun Na’i Moris-Hi’as nian no halo ema hotu sai isin ida de’it. Maibé Kreda la’ós de’it isin ida harii iha Espíritu Santu, maibé Kristu nia Isin; nia mak don ida simu iha Batizmu, ne’ebé soi nu’udar konsekuénsia komuñaun kle’an domin nian.
Kristu hadomi Kreda. Presiza korresponde ba domin ne’e no fahe nia, Amu-Papa hatetn. Nia esplika katak divizaun sira, inveja sira, inkomprensaun sia no marjinalizasaun sira la harii Kreda nu’udar Kristu nia Isin; iha kontráriu, sobu nia.
“La sai siumentu, maibé apresia iha ita-nia komunidade sira don sira no kualidade sira ita-nia maun-alin sira-nian. Basá sente siúme se ema ruma sosa karreta ida eh manán iha loteria sobu Kristu nia Isin. Siúme buras no hakonu fuan, no fuan siumentu sai siin, no envezde raan nia iha tua-siin”.
Konsellu seluk husi Papa Francisco mak hatudu prosimidade ba sira ne’ebé terus, espresa gratiduan rasik ba ema hotu no, ho modu espesiál, ba sira ne’ebé hala’o servisu ki’ik liu. No, ikusnian, la sente an superiór liu ema seluk.
“Ema hira mak sente superiór ba ema seluk. Ita mós dehan hanesan farizeu ai-kanoik nian: ‘Ha’u agradese Ita, Na’i, basá ha’u la’ós hanesan ema ne’ebá, ha’u superiór. Nunka halo buat ne’e. Bainhira akontese, hanoin kona-ba ó-nia salan sira, sira ne’ebé ema ida la hatene no moe iha Maromak nia oin no taka ibun”.
Papa Francisco taka katekeze hodi husu Espíritu Santu atu tulun sarani hotu moris nu’udar Kristu nia Isin, metin nu’udar família no nu’udar sinál vizivel no furak Kristu nia domin nian.
Remata katekeze, Papa Francisco fó hanoin kona-ba Papa João Paulo II nia eransa espirituál: “Ohin ita selebra memória litúrjika S. João Paulo II nian, ne’ebé konvida ema hotu atu loke odamatan ba Kristu. Atu ema la haluha ninia eransa espirituál, maibé dudu ita ba reflesaun no ba hahalok konkretu ba Kreda, família no sosiedade nia di’ak”.
