Maun no biin-alin sira, bondia!
Iha Evanjellu domingu ne’e nian (Mc 1,1-8) aprezenta João Batista nia figura no obra. Nia hatudu ba ninia kontemporáneu sira itinireráriu fiar nian ida hanesan ho buat ne’ebé Adventu propoin mai ita, atu ita prepara atu simu Na’i iha Natál. Itineráriu fiar nian ida-ne’e mak itineráriu ida konversaun nian. Saida mak liafuan “konversaun” signifika? Iha Bíblia uluknanai hakarak dehan muda diresaun no orientasaun; i nune’e muda mós modu hanoin nian. Iha vida morál no espirituál, konverte an signifika pasa husi aat ba di’ak, husi salan ba Maromak nia domin. No ida-ne’e mak Batista hanorin, iha rai-fuik maran Judeia nian «haklaken batizmu ida konversaun nian ba sira ne’ebé rona ninia pregasaun no deside halo peniténsia. Batizmu ne’e realiza ho imersaun iha Jordaun, iha bee, maibé nia lafolin, sai de’it sinál ida no nia rezulta katak lafolin se la iha disponibilidade atu arrepende no muda moris.
Konversaun envolve laran terus ba salan ne’ebé halo ona, hakaran atu sai livre husi salan sira, propózitu atu hasai ba nafatin husi moris. Atu hasai salan, presiza rejeita mós buat ne’ebé liga ho salan, sasán sira ne’ebé liga ho salan no katak presiza rejeita mentalidade mundu nian, hadomi demais komodizmu, hadomi demais prazér, moris di’ak, rikusoin. Ezemplu hadook an ida-ne’e, dala ida tan, mai husi Evanjellu ohin nian iha figura João Batista nian: ema ida rigorozu, ne’ebé hakribi moris naresin no buka esensiál. Ne’e mak aspetu dahuluk konversaun nian: hakore-an (dezapegu) husi salan no mundanizmu. Hahú dalan ida hakore-an nian husi buat sira-ne’e.
Aspetu seluk konversaun nian mak dalan nia finalidade, katak buka Maromak no ninia reinu. Hakore-an husi sasán mundu nian no buka Maromak no ninia reinu. Abandonu komodizmu no mentalidade mundu nian la’ós finalidade, la’ós axeze ida atu halo de’it peniténsia: ema sarani la halo nia an “fakir”. Nia buat seluk ida. Hakore-an/dezapegu la’ós finalidade iha an rasik, maibé nia finalidade mak hetan buat ruma boot liu, katak Maromak nia reinu, komuñaun ho Maromak, amizade ho Maromak. Maibé ida-ne’e la’ós fasil, tanba iha tali barak ne’ebé dada tun ita besik ba salan, no la’ós fasil… Tentasaun nafatin dada tun, dada tun. Nune’e tali sira halo ita besik ba salan: inkonstánsia, dezánimu, malísia, ambiente ne’ebé halo aat, ezemplu aat sira. Dalaruma impulsu ne’ebé ita sente ba Na’i fraku liu no parese Maromak nonok; parese katak ninia promesa konsolasaun nian dook liu no la reál, hanesan ilas bibi-atan ne’ebé iha laran-manas no atensaun lais, ne’ebé ita rona ohin iha leitura Isaías nian (Is 40,1.11). Nune’e ita iha tentasaun atu dehan katak imposivel konverte loloos. Dala hira mak ita rona dezánimu ida-ne’e! “La’e, ha’u labele. Ha’u hahú uitoan hafoin ha’u bá fali kotuk”. No ida-ne’e ladi’ak. Maibé posivel, posivel. Bainhira hanoin dezánimu ne’e mai, keta hela iha hanoin ne’e, tanba ida-ne’e rai-henek ne’ebé tolan, rai-heenk ne’ebé tolan: rai-henek ne’ebé tolan moris iha mediokridade. Ida-ne’e mediokridade. Saida mak bele halo iha kazu sira hanesan ne’e, bainhira ema ida hakarak bá maibé sente katak nia la iha kbiit? Uluknanai presiza hanoin katak konversaun mak grasa ida: ema ida labele konverte an ho ninia forsa rasik. Ne’e mak grasa ida Na’i haraik ba ó, nune’e presiza husu ba Maromak ho forsa, husu ba Maromak atu Nia konverte ita, atu tebes duni ita bele konverte an, tuir sasukat ita-nia loke an nian ba fafurak, ba laran-di’ak, ba laran-mamar Maromak nian. Maromak la’ós ida hatudu oin aat, aman ida hahalok aat nian, lae. Nia laran mamar, nia hadomi maka’as ita, hanesan Bibi-Atan di’ak, ne’ebé buka nnia bibi ikus. Domin, konversaun mak ida-ne’e: Maromak nia grasa. Ó hahú la’o, tanba Nia dudu atu ó la’o, no ó sei haree oinsá mak Nia mai. Harohan, la’o no halo nafatin ain-hakat ba oin.
Maria Santíssima, ne’ebé bairua ita sei selebra nu’udar Imakulada, tulun ita atu hakore-an husi salan no mundanizmu, atu loke an ba Maromak, ba nia liafuan, ba nia domin ne’ebé halo moris hikas no salva.
