Liturjia ohini nian konvida ita ba deskoberta Maromak nia domin nian, hodi haka’as an atu hala’o moris ida komuñaun nian ho Nia.
Evanjellu aprezenta mai ita Aman Maromak ne’ebé hadomi ho forma gratuita, ho domin fiél no rohan laek, maski oan rebelde halo hilin laloos no lahó responsabilidade. No domin ida-ne’e nafatin hein, lahó kondisaun, atu simu no hakohak oan ne’ebé deside atu filafali. Ne’e mak domin ida laran-sadia nian no la’ós tuir justisa ema nian.
Leitura daruak konvida ita atu simu oferta domin nian ne’ebé Maromak halo mai ita liuhusi Jezús. Ho de’it rekonsiliasaun ho Maromak no ho maun-alin sira ita bele sai kriatura foun.
Leitura dahuluk, konvida ita ba konversaun, nu’udar prinsípiu ba vida foun iha rai ksolok nian, liberdade nian no dame nian. Ema foun mak don ida Maromak nian ne’ebé hadomi ita no konvoka ita ba ksolok.
