Liturjia Domingu daneen Páskua nian konvida ita atu deskobre Maromak nia prezensa hakmatek maibé efikás iha Kreda nia dalan iha istória. Jezús nia promesa – “ha’u sei la husik imi oan-kiak” – bele sai sínteze di’ak tema ohin nian.
Evanjellu aprezenta mai ita parte ida Jezús nia “testamentu”, iha han-kalan despedida nian. Ba dixípulu sira ne’ebé la hakmatek, Jezús promete “Paráklitu”: Nia sei lori komunidade sarani ba diresaun lialoos nian; no lori ba komuñaun íntima ba beibeik ho Jezús no ho Aman Maromak. Nune’e, komunidade sei sai “Maromak nia horik-fatin” iha mundu no fó sasin salvasaun ne’ebé Nia hakarak oferese ba ema sira.
Leitura dahuluk hatudu komunidade fó sasin Liafoun Di’ak no sai prezensa libertadora no salvadora iha ema sira nia moris. Espíritu sei hatudu an no atua bainhira komunidade aseita moris nia fiar integra an iha família universál maun-alin sira nian, hale’u Aman no Jezús.
Leitura daruak husu sarani sira – iha mundu nia rai-kunan nia oin – atu iha konfiansa, atu fó sasin fiar nian iha hakmatek, atu hatudu domin ba ema hotu, ba funu-balu sira mós. Kristu ne’ebé halo nia moris don ida domin nian ba ema Kristu, tenke sai modelu ne’ebé sarani sira tenke tuir.
