Tema
Maromak nia Liafuan iha Domingu X Tempu Komún repete, ho insisténsia ruma katak Maromak prefere mizerikórdia liufali sakrifísiu. Espresaun ne’e tenke komprende iha sentidu katak, ba Maromak, esensiál la’ós hahalok esternu sira kultu nian ka deklarasaun sira intensaun di’ak nian, maibé atitude ida adezaun loos nian no koerente ba ninia bolun, ba ninia proposta salvasaun nian. Ida-ne’e mak tema liturjia loron ne’e nian.
Iha leitura dahuluk, profeta Oseias tau iha kauza komunidade nia sinseridade ne’ebé hakarak kontrola no manipula Maromak, maibé la iha interese loloos atu adere, ho fuan sinseru no loos, ba aliansa. Hahalok esternu sira kultu nian – maski riku no boboot – la signifika buat ida, se la iha domin (domin ba Maromak, domin ba maluk – nu’udar sorin seluk domin nian ba Maromak.
Iha leitura daruak, Paulo aprezenta ba sarani sira (sira ne’ebé mai husi judaízmu no sira ne’ebé mai husi paganizmu) buat esensiál ida mesak: fiar. Figura Abraão nian mak ezemplár: buat ne’ebé halo nia sai modelu ida mai ita hotu la’ós obra sira ne’ebé nia halo, maibé ninia adezaun totál, inkondisionál no tomak ba Maromak no Ninia projetu sira.
Evanjellu aprezenta mai ita katekeze ida kona-ba resposta ne’ebé ita tenke fó ba Maromak ne’ebé bolu ema hotu, lahó exesaun. Mateus nia ezemplu sujere katak buat ne’ebé desizivu, husi Maromak nia pontudevista, mak resposta pronta ba ninia konvite atu integra iha komunidade “Reinu” nian.
