Liturjia domingu ne’e nian aprezenta mai ita Maromak ida laran-di’ak no laran-sadia nian, ne’ebé detesta salan, maibé hadomi ema maksalak; tanba ne’e, Nia hakbarak ninia oferta salvasaun nian. Husi deskoberta Maromak ida hanesan ne’e, suli mai ita domin no vontade atu moris vida foun, integra an iha ninia família.
Leitura dahuluk aprezenta mai ita, liuhusi David maksalak nia istória, Maromak ida ne’ebé la halo moruk ho salan, maibé mós la husik sala-na’in ne’ebé rekoñese ninia falta no aseita don laran-sadia nian.
Iha leitura daruak, Paulo garante ita katak salvasaun mak don gratuitu ne’ebé Maromak oferese, la’ós konkista umana ida. Atu iha asesu ba don ne’e, la’ós fundamentál kumpre ritu sira no kumpre lei sira didi’ak. Maibé presiza adere ba Jezús no identifika an ho Kristu iha domin no iha saran-an: ida-ne’e mak lori ba moris nakonu.
