Leitura sira domingu ne’e nian konvida ita atu reflete tema ospitalidade no akollimentu/simun nian. Ezisténsia sarani mak akollimentu Maromak nian no Ninia proposta sira; no asaun hotu maksi ba maluk nia di’ak, tenke mai husi enkontru loos ho Jezús no husi raronak Jezús nia Liafuan. Ne’e mak permite atu hetan sentidu ba ita-nia asaun no ba ita-nia misaun.
Leitura dahuluk propoin mai ita figura patriarka Abraaun nian. Iha figura ne’e aprezenta modelu ema ida ne’ebé matan moris ba ema ne’ebé liu, fahe buat hotu nia iha ho maluk ne’ebé liu iha nia dalan no haree iha bainaka ne’ebé tama nia tenda laran, Maromak rasik nia figura/ilas. Nia konsekuénsia mak rekompensa husi Maromak.
Evanjellu aprezenta kuadru seluk ospitalidade no akollimentu Maromak nian. Maibé sujere mós katak, ba ema sarani, simu Maromak iha nia uma la’ós tama iha ativizmu, maibé tuur iha Jezús nia ain, rona ninia proposta sira. Iha Nia, mak Aman halo nia proposta mai ita, hodi simu ninia Liafuan.
