Tema fundamentál ne’ebé liturjia konvida ita atu reflete, domingu ne’e, mak tema orasaun nian. Hodi tau iha ita-nia oin ezemplu sira Abraaun no Jezús nian, Maromak nia Liafuan hatudu mai ita importánsia orasaun nian no hanorin ita atitude ne’ebé fiar-na’in sira tenke asume iha diálogu ho Maromak.
Leitura dahuluk sujere katak orasaun loos mak diálogu “oin ho oin”, iha-ne’ebé ema – ho haraik-an, reverénsia, respeitu, maibé mós ho aten-barani no konfiansa – aprezenta ba Maromak laran-susar, dúvida sira, anseiu sira no buka komprende Maromak nia projetu ba mundu no ba ema sira.
Evanjellu halo ita tur iha banku “eskola orasaun” Jezús nian. Nia hanorin katak fiar-na’in nia orasaun tenke sai diálogu konfiante labarik ida-nian ho nia “papá”. Ho Jezús, fiar-na’in simu konvite atu deskobre iha Maromak “Aman” no halo diálogu ho modu frekuente ho Nia kona-ba mundu foun ne’ebé Aman/Maromak hakarak oferese ba ema sira.
Leitura daruak, la refere ho modu direu ba orasaun, maibé konvida ita atu halo Kristu referénsia fundamentál (iha kontestu reflesaun kona-ba orasaun, ita bele dehan katak Kristu tenke sai referénsia no modelu fiar-na’in nian ne’ebé harohan: iha frekuénsia no iha forma diálogu nian ho Aman).
