Liturjia domingu ne’e nian sujere mai ita reflesaun ida kona-ba ita-nia responsabilidade hasoru maun no biin-alin sira ne’ebé hale’u ita. Nia afirma momoos katak, ema ida labele sai indiferente iha buat ne’ebé ameasa maluk ida nia moris no ksolok nia oin, no katak ita hotu responsavel ba malu.
Leitura dahuluk ko’alia mai ita kona-ba profeta nu’udar “sentinela” (guarda), ne’ebé Maromak tau atu hein ema sira nia sidade nian. Atentu ba Maromak nia projetu siraa no ba realidade mundu nian, profeta hatene/komprende buat ne’ebé estraga Maromak nia planu no hanetik/impede ema nia ksolok. Nu’udar sentinela responsavel, nia alerta komunidade ba perigu sira ne’ebé ameasa komunidade.
Evanjellu hatudu momoos ita-nia responsabilidade atu tulun maluk ida-idak atu foti konxiénsia kona-ba ninia erru/salan sira. Ne’e mak devér ida mai husi ukun-fuan domin nian. Jezús hanorin katak dalan loos atu atinje objetivu ne’e la’ós hatuun ema eh kondena ema ne’ebé falla, maibé liuhusi diálogu fraternu, leál, amigu, ne’ebé hatudu ba maluk katak ita-nia intervensaun mai husi domin.
Iha leitura daruak, Paulo konvida sarani sira Roma nian (no husi fatin no tempu hotu) atu tau iha sentru ezisténsia sarani nian ukun-fuan domin nian. Ne’e mak “tusan” ida ne’ebé ita iha ba ita-nia maun no biin-alin sira hotu, no ita nunka selu kompletu.
