Dili – Loron 9 Maiu mak loron ne’ebé Madre Mazzarello moris, tuir tradisaun festa Madre Mazzarello selebra iha loron ninia mate nian, katak iha loron 13 Maiu, maibé tanba iha diocese Dili iha mos prosisaun Nossa Senhora de Fátima, entaun ho okaziaun ida ne’e ami antisipa atu selebra iha loron 09 fulan Maiu.
Selebrasaun festa Ko-fundadora Institutu FMA, Madre Mazzarello, ba tinan ida ne’e lahanesan tinan-tinan, ba tinan ida ne’e selebrasaun festa MM nian hamutuk ho Familia salesiana hotu, ne’ebé eziste iha Timor inklui mos estudante sira no inan ama balun.
Hahu ho selebrasaun Eukaristia iha oras 06.00 otl iha parokia Maria Auxiliadora Comoro Dili, nu’udar selebrante Padre Apolinario provincial SDB TIN no padre salesiano sira husi komunidade tolu Provinsial house, post Novisiadu no Pustek. Padre provincial iha nia omilia hateten katak; familia salesiana tinan tomak ne’e reitor Mor husu ba ita “ foti matan hateke sa’e katak santidade” ita halibur hamutuk atu agradese Maromak ba domin boot ba familia salesiana liu husi Madre Mazzarello. Historia haktuir katak MM ne’ebé mehi hanesan Don Bosco mai husi laran atu halo obra ida Maromak nian atu tau matan ba foinsa’e sira, Don Bosco no Madre Mazzarello hala’o Maromak nia obra atu soi klamar sira, ho devosaun ba Na’i-Feto, tulun nia atu lori ba oin kongregasaun FMA, iha solenidade festa Madre Mazzarello nian ne’e tulun ita atu koko inan ida ne’e nia domin, espiritualidade Mornese tama iha ita ida-idak nia moris, Maromak aprezenta liu husi dalan oioin iha momentu ne’e liu husi Madre Mazzarello nia misaun fo sasin kona ba evanjellu, tau Maromak nia liafuan atu moris iha loro-loron. Madre Mazzarello hato’o ba ita familia Salesiana liu-liu FMA sira, liu-liu iha moris loro-loron hatudu ksolok no oin midar, tanba ksolok no oin midar lori ita atu esperimenta lalehan. Ikus liu padre hatutan tan katak liafuan santidade ne’e hala’o iha ita nia moris loro-loron, Madre Mazzarello nia surat dehan; akompaña, tulun malu, pasiensia ba malu, karidade ida ne’e Maromak hakonu iha ita nia moris, nune’e ita presiza habelar no hala’o iha ita nia moris. Fo obrigado ba vokasaun ne’ebé liu husi Madre sira ne’ebé oras ne’e hela hoi ta iha ne’e.
Remata tiha Selebrasaun Eukaristia, iha programa jantar hamutuk no konvivio, hafoin taka ho boanoite, ne’ebé hala’o iha Gym eskola Maria Auxiliadora. Mensajen badak husi boanoite ne’eb’e hato’o husi madre Sebastiana, nudar reprezentante madre provincial, hateten katak; “uluknanai hato’o obrigado wain ba Familia Salesiana sira hotu ne’ebé fo sira nia tempu atu haksolok hamutuk iha festa Madre Mazzarello nian. Liafuan ne’ebé Madre Mazzarello dehan nafatin ba irman sira, benfeitor sira, joven sira ho ninia surat hotu ne’ebé nia hakerek nia dehan “ haksolok nafatin, no haksolok nafatin iha Na’i nia naran, nia dehan wainhira ita haksolok diabu tauk, maibé wainhira ita triste diabu manan lalais, nune’e ninia espiritualidade ksolok ida ne’e hatutan iha ita hotu, se mak haksolok horik iha Na’i, se mak hatene hadomi ema seluk tanba hadomi iha Na’i, se mak hatene agradese iha Na’i tanba nia hadomi Maromak, ema fuan nakonu ho domin no ksolok hatene hadomi Maromak hatene agradese Maromak, hatene agradese resiprokamente ema hotu. Madre Mazzarello iha lalehan haksolok no nia husu mos ita hotu-hotu ne’ebé hola parte ba Maria Auxiliadora ninia oan sira, haksolok nafatin, haksolok iha Na’i maske iha terus buat hotu sei liu.
(Maria Sarmento Guterres)
