D
ili – Comoro, 13-14/01/2020, iha loron rua ne’e hahu horseik no ohin atividades eskolar Maria Auxiliadora nian hahu ona. Iha loron dahuluk nian, segunda-feira, 13 de janeiru, Irmã Diretora Escola, Ir. Suzana Alves dos Santos ho Coordenador Ensino Básico 1º Ciclo nian Prof. Julio Belo hamutuk ho Irmãs no Professores hotu, prepara ambiente atu simu alunos foun 1º ano nian iha loron aban. Nune’e alunos hotu nebe tama iha loron ne’e mak husi 2ºano – 9ºano. Ba turno dader nian husi 2ºano – 6ºano, iha nebe Irmã diretora simu sira hamutuk iha Gim Eskola nian. Iha ne’e Irmã mos apresenta kada Professor/a da turma husi 2ºano-6ºano ba alunos sira no iha tempo hanesan prepara mos alunos 6ºano turma ABC atu simu nia alin 1ºano sira hodi tara naran ba sira no lori ba forma iha fila turma nian, no mos prepara músika simples ida hodi simu sira iha loron aban. Remata ne’e kada Klase ba sira nia aula hamutuk ho sira nia Professor/a da turma atu kontinua sira nia atividade loron dahuluk nian, mak hanesan: “Konhese malu, hare Horario, pikete limpeza, halo regra simples aula nian, etc.” Hafoin iha turno meiu-dia nian, Irmã Diretora mos simu alunos sira hodi apresenta Professor/a responsavel ba kada turma iha tinan ne’e. Hafoin iha oras primeiro nian, alunos ba ho sira nia Professor/a da turma atu prepara ambiente aula nian, hodi halo: regra da aula, Estrutura aula nian, pikete etc. Hafoin iha segunda horas ba oin lisaun hanesan bain-bain, to’o remata iha tempo eskola nian katak tuku 5:50. Iha loron ohin 14/01/2020, alunos sira turno dader nian tama kompletu ona husi 1ºano-6ºano. Nune’e, 2ºan0-6ºano forma iha Gim laran atu simu alin 1ºano sira. No 1ºano sira forma iha liur Gim nian, hafoin Irmã Diretora hahu bolu alunos foun ida-ida nia naran no bin-maun sira 6ºano, mai ho sira nia naran atu tara ba sira nia kakorok no lori sira ba forma iha fila turma nian. Ne’e hanesan maneira foun ida ne’ebé atraí tebes alunos 1ºano sira hodi la fó importansia ba sira nia inan-aman no kontente tebes atu tama iha ambiente eskola no klase nian tamba, hotu-hotu preparado hodi simu sira ho ksolok. La to’o iha ne’e deit, maibe, depois de simu sira iha Gim ho músika “Ha’u iha Ksolok-ksolok iha ha’u fuan”, 2ºano-4ºano ba forma iha dalan hodi kontinua akompanha alin sira, atu ba sira nia aula. Nune’e alunos foun sira sente importante los seguru tebes iha loron ne’e, hamutuk ho sira nia Professora da turma. No atividades aulas nian kontinua la’o ho diak liu no iha loron ne’e, la iha alunos foun ida nebe tanis iha aula to’o rekreiu no eskola sai.
(Zélia Matos Lemos)
