“Buat be imi halo ba Ha’u-nia maun-alin ki’ik liu, imi halo mai Ha’u”
Baucau – Tempu kuarezma husu ba sarani hotu atu halo itineráriu kuarezmál gia husi Maromak nia Liafuan, hodi halo prátika sira ne’ebé karakteriza tempu ne’e hanesan jejún, karidade no orasaun. Ho objetivu ne’e mak menina na’in 9 husi grupu Mazzarello Baucau, (Ivania, Clara, Maria Dulce, Delya, Lili, Catia, Jina, Veronica no Lidia) halo sira nia prátika ne’e no ho modu konkretu ba vizita família rua iha Dewake ne’ebé hela mesak hamutuk ho irmán Jacinta Gusmão.
Família avó José no Maria, katuas tinan 90 ho nia kaben ne’ebé fuuk monu hotu tan moras, no avó Maria do Carmo, ne’ebé hela mesak no nia ain sorin amputasaun nune’e la’o hakdasak de’it.
Molok sira bá, irmán Jacinta konvida sira atu halo orasaun hamutuk iha kapela FMA Teulale hodi oferese hahalok karidade ne’e ba Maromak ne’ebé maski kiak halo an kiak atu so’i ita ho Ninia moris kiak. Iha nia mensajen ba Kuarezma Papa Francisco hateten katak “Hodi banati tuir ita-nia Mestre, ita, sarani sira, simu bolun atu haree maun no biin-alin sira nia moris-mukit, atu kona sira, atu okupa an ho sira no serbisu konkretamente atu hakmaan sira”.
Grupu Mazzarello mak grupu harii iha fulan Janeiru no nia objetivu mak hakle’an vida sarani hodi deskobre Maromak nia projetu ba sira an rasik.
Iha vizita ba família rua ne’e, menina sira la’ós lori de’it sasán ruma sira halibur maibé liuliu sira-nia prezensa ksolok nian hodi fó tempu uitoan hodi dada-lia ho família sira. Sira mós ba kuru bee uitoan ba família avó José no Maria nian. Sira rua la iha oan no tanba uluk sira hakiak sobriña ida, nune’e sobriña ne’e mak tau matan no mai atu tein hahán ba sira.
Empeñu kuarezmál vizita ema kiak liu la hala’o de’it husi grupu Mazzarello, maibé mós husi grupu Infánsia Misionária no oratorianu Dewake nian.
