Dili – Ba dala uluk, foin-sa’e sira husi Diozese tolu, hamutuk ho sira-nia responsavel Pastorál Juveníl nian, no reprezentante husi grupu kategoriál oin-oin halibur hamutuk iha Dili atu harii MFTL (Movimentu Foin-sa’e Timor Leste).
Konferénsia Episkopál Timorense (CET) hili Bispu Dili, mons. Virgilio do Carmo da Silva, sdb, nu’udar referente no responsavel ba Pastorál Juveníl iha Timor. Nune’e, nia deside atu halibur hamutuk nailulik responsavel ba Pastorál Juveníl iha Diozese tolu no hanoin bele unifika esperiénsia fiar nian iha foin-sa’e Timor oan sira hodi kria estrutura ida.
Ohin dadeer reprezentante liu 120 husi Timor tomak, hamutuk ho relijioza balun, kapelaun sira husi Universidade oinoin, halibur hamutuk iha Salão Catedral Dili nian atu rona proposta furak ne’e. Amu-Bispu Virgilio loke enkontru hodi haktuir motivasaun no iter ne’ebé lori atu hakarak hari’i estrutura ida ne’e. Tuir mai sra. Didi (husi CNJTL) no sr. Leovigildo Hornai, hato’o palestra badak ida: sra. Didi kona-ba “Feto nia partisipasaun iha Kreda no Nasaun” no sr. Leovigildo “Foin-sa’e sira nia partisipasaun tane Kreda no Nasaun”.
Depois, to’o tempu han meiudia, asembleia rona no fó sujestaun eh proposta modifikasaun nian ba Estatuto ne’ebé na’ilulik nain tolu, responsavel ba PJ diozesana, hamutuk ho Amu-Bispu, elabora ona.
Lokraik Amu-Bispu aprezenta dalan ne’ebé sei hala’o atu bele hahú MFTL iha Kruz Joven; hili ona ema ruma ne’ebé sei forma komisaun atu korije no hadi’ak Estatutu, hafoin sei hili foin-sa’e sira ne’ebé sei tama iha estrutura hamutuk ho Sekretáriu Jerál ne’ebé hili ona, katak pe. João Soares.
Ita akompaña prosesu ida ne’e ho serteza katak eventu ida ne’e sei marka istória Kreda Timor nian.
(Alma Castagna)
