Denpasar (Indonesia) – Ba dala uluk Timor-Leste tuir enkontru anuál “Asian Liturgy Forum” husi 10-14 Outubru iha Nusa Dua, Denpasar-Bali. Enkontru ne’e mak ba dala-20 no tema tinan ne’e nian mak “The Sacrament of Reconciliation: sacrament of God’s mercy”. Partisipante sira iha tinan ne’e husi nasaun 8: Tailandia, Taiwan, Filipinas, Indonesia, Malaysia, Myanmar, Cambodia no Timor-Leste, hamutuk 39, aleinde observadór/a sira, professor/a sira husi Institutu/Universidade Katólika no Semináriu sira, no mós relijiozu/a sira seluk, nune’e, haboot númeru to’o atus ida resin. Delegadu/a Timor-Leste mak Pe. Rolando Fernandez SDB, Ir Jacinta Gusmão FMA (Baucau) no mestre Marçal Evaristo (Dili).
Atividade sira hahú ho abertura horisehik ho Eukarisia no “opening ceremonies” hanesan parade nasaun sira-nian, diskursu sira, jantár no aprezentasaun kulturál ruma.
Ohin, 11 Outubru, atividade ho palestra husi oradór Mons. Florencio Salvador, Jr (Filipinas) aprezenta input kona-ba tema “Sakramentu Rekonsiliasaun: Sakramentu Maromak nia laran-sadia nian”. Iha ninia palestra nia aprezenta Ritu foun “Ordo Penitentiae” ninia karakterístika sira kompara ho ritu tuan. Ritu foun ne’e hakarak salienta liután Maromak nia mizerikórdia duké julgamentu. Énfaze seluk mak la’ós penitente mak hahú atu ko’alia bainhira hakbesik amlulik, maibé, amlulik mak fó benvindu hodi simu nia ho laran-di’ak. Basá bainhira ema ida hakbesik ba sakramentu rekonsiliasaun, nia halo ona dalan atu arrependimentu nian, no hodi hamriik atu hakbesik ministru, nia hatudu konfiansa iha Maromak nia mizerikórdia.
Ritu ne’e klarifika papél amlulik nian, ne’ebé “in persona Christi” no “in persona ecclesia” kore ema husi ninia salan sira no halo nia sai kriatura foun. Nune’e mak fórmula absolvisaun nian foti hotu husi Sagrada Eskritura: “God the Father of mercies [2Cor1,3], through the death and resurrection of his Son [Rom 5,10], has reconciled the world to Himself [2Cor 5,18] and sent the Holy Spirit among us for the forgiveness of sins [Jn 20,21-22] through the ministry of the Church [Mt16,19; 2 Cor5], may God grant you pardon and peace [Gal 5,22]”.
Hotu tiha input iha partilla kona-ba oinsá moris “Sakramentu Rekonsiliasaun” iha kontestu nasaun ida-idak. Nasaun sira aprezenta iha loron daruak ne’e mak Taiwan (grupu rua), Sarawak Malaysia, Cambodia no Tailandia. Timor nian aban mak aprezenta.
