Maun no biin-alin sira, bondia!
Evanjellu domingu daruak Tempu Ordináriu nian (kf Jo 1,35-42) aprezenta Jezús nia enkontru ho ninia dixípulu dahuluk sira. Enkontru hala’o iha mota Jordão, loron ida depoizde Jezús nia batizmu. João Batista rasik mak hatudu Mesias ba sira na’in rua ho liafuan sira-ne’e: «Ne’e mak Maromak nia bibi-oan!» (v. 36). No sira rua, hodi konfia iha Batista nia sasin, sira la’o tuir Jezús husi kotuk. Nia nota no husu: «Imi buka saida?», no sira hatán: «Mestre, ita hela iha-ne’ebé?» (v. 38).
Jezús la hatán: “Ha’u hela iha Cafárnaum eh iha Nazaré”, maibé dehan: «Imi mai no haree» (v. 39). La’ós billete ida vizita nian, maibé konvite ba enkontru ida. Sira rua tuir nia no loraik ne’e sira hela ho Nia. La’ós difisil atu imajina sira tuur no halo pergunta ba Nia no liuliu rona Nia, sente sira fuan manas ba beibeik enkuantu Mestre ko’alia. Sira nota beleza liafuan sira nian ne’ebé hatán ba sira-nia esperansa boot liután. No derepente sira deksobre katak, enkuantu hahú sai kalan, iha sira, iha sira fuan, naroman ida mosu ne’ebé Maromak de’it mak bele haraik. Buat ida ne’ebé dada atensaun: sira ida, liutiha tinan 60, eh karik liu, hakerek iha Evanjellu: «Besik tuku haat loraik» (Jo 1,39), nia hakerek tuku hira. No buat ne’e halo ita hanoin: enkontru auténtiku ho Jezús sai memória moris, nunka haluha. Enkontru barak ó haluha, maibé enkontru loos ho Jezús hela ba nafatin. No sira-ne’e, liutiha tinan barak, sei hanoin mós oras, sira labele haluha enkontru ida haksolok nune’e, nakonu nune’e, ne’ebé muda sira-nia moris. Hafoin, bainhira sira sai husi enkontru ne’e no fila fali ba maun-alin sira, ksolok ne’e, naroman ne’e suli naresin husi sira fuan hanesan mota ne’ebé nia bee sae. Sira rua ne’e ida, André, dehan ba nia maun Simão – ne’ebé Jezús sei hanaran Pedro bainhira hasoru nia –: «Ami hasoru Mesias» (v. 41). Sira sai iha serteza katak Jezús mak Mesias, seguru.
Ita para momentu ida iha esperiénsia enkontru nian ho Kristu ne’ebé bolu atu horik ho Nia. Maromak nia bolun ida-idak mak insiativa ida nia domin nian. Nia mak nafatin foti insiativa, Nia bolu ó. Maromak bolu ba vida, bolu ba fiar, no bolu ba estadu patikulár ida vida nian: “Ha’u hakarak ó iha-ne’e”. Maromak nia bolun dahuluk mak ida ba vida, iha-ne’ebé nia konstitui ita nu’udar ema sira; ne’e mak bolun individuál ida, tanba Maromak la halo sasán sira tuir série. Hafoin Maromak bolu ba fiar no atu halo parte ba ninia família, nu’udar Maromak nia oan sira. Iksumai, Maormak bolu ba estadu partikulár ida vida nian: atu saran ita an rasik iha vida matrimóniu, iha ida saserdósiu nian eh vida konsagrada nian. Ne’e modu lahanesan atu realiza Maormak nia projetu, ida ne’ebé Nia rasik iha mai ita ida-idak, ne’ebé nafatin nu’udar planu ida domin nian. Maromak bolu nafatin. No ksolok boot liu fiar-na’in ida nian mak hatán ba bolun ne’e, oferese an tomak ba servisu Maromak nian no maun-alin sira-nian.
Maun no biin-alin sira, hasoru Na’i nia bolun , ne’ebé to’o mai ita ho maneira rihun-rihun liuhusi ema mós, akontesimentu ksolok no triste, dalaruma ita-nia atitude mak rejeisaun – “Lae… Ha’u ta’uk … –, rejeita tanba parese kontráriu ho ita-nia aspirasaun sira; no mós ta’uk, tanba ita konsidera ezijente no inkómodu liu: “Ah ha’u sei la konsege, di’ak liu lae, di’ak liu moris hakmatek… Maromak iha-ne’ebá, ha’u iha-ne’e”. Maibé Maromak nia bolun mak domin, ita tenke buka atu hetan domin ne’ebé iha bolun hotu ni kotuk, no hatán ba ne’e ho domin de’it. Ne’e mak nia linguajen: resposta ba bolun ida ne’ebé mai husi domin mak domin de’it. Iha inísiu iha enkontru ida, loos duni, enkontru ho Jezús, ne’ebé ko’alia mai ita kona-ba Aman, halo ita hatene ninia domin. Nune’e iha ita mosu espontáneu hakaran atu komunika nia ba ema sira ne’ebé ita hadomi: “Ha’u hasoru Domin”, “ha’u hasoru Mesias”, “ha’u hasoru Maromak”, “ha’u hasoru Jezús”, “ha’u hetan ha’u-nia nia vida nia sentidu”. Iha liafuan ida: “Ha’u hasoru Maromak”.
Atu Virjen Maria tulun ita halo ita-nia vida knananuk ida louvór nian ba Maromak, nu’udar resposta ba ninia bolun no nu’udar realizasaun ninia vontade iha haraik-an no ksolok. Maibé ita hanoin hikas ida-ne’e: ba ema ida-idak, iha vida, iha momentu ida, iha-ne’ebé Maromak sai prezente forte liu, ho bolun ida. Ita hanoin hikas ne’e. Mai ita fila ba kotuk, ba momentu sira-ne’e, tanba memória kona-ba momentu ne’e hafoun nafatin iha enkontru ho Jezús.
