CONECTIL akrónimu ba “Concelho Nacional da Educação Católica” mak órgaun ofisiál Kreda nian ne’ebé hala’o knaar iha área edukasaun hodi “dedika an atu dezenvolve kapasitasaun rekursu umanu liuhusi eskola atu labarik sira iha kredibilidade morál, integradu, profisionál, forma komunidade ne’ebé iha matenek di’ak no sai matadalan atu had’iak Nasaun no ambiente kulturál Timór nian” (Estatuto CONECTIL nian ad experimentum). CONECTIL reprezenta Igreja nia interese iha área edukasaun, tuir kompeténsia ne’ebé hakerek iha ninia estatutu, katak, “CONECTIL iha kompeténsia atu planeia programa edukativu no promove Edukasaun Katólika iha eskola, iha nivel ensinu hotu” (artigu 6, 1 no 2).
Kreda Katólika nu’udar instituisaun ne’ebé horiuluk kedas hala’o knaar iha área edukasaun hamutuk ho Estadu hakarak dezenvolve sistema edukativu tuir lei no kultura nasaun nian. Nune’e maka iha loron 19 Abríl 2011, asina tiha “Memorandum de Entendimento” ida ho Ministériu Edukasaun ho objetivu atu define kooperasaun entre Igreja Katólika no Estadu Timor-Leste ho finalidade atu garante direitu, devér no responsabilidade husi parte rua iha área edukasaun katólika ne’ebé CONECTIL no Ministériu Edukasaun maka sei ezekuta.
Atu bele hametin CONECTIL nia servisu, iha loron 8 Juñu liubá, hala’o tiha enkontru ida iha Baucau ho bispu, iha kazu ida-ne’e Don Basílio nu’udar prezidente Konferénsia Episkopál, provinsiál sira husi kongregasaun ne’ebé dedika an ba edukasaun no fundasaun ba edukasaun katólika sira. Husi FMA sira partisipa ir Paola Battagliola, ir Lubélia Alves no ir Zelia Lemos. Tuir programa loloos enkontru ne’e ko’alia kona-ba servisu hamutuk entre CONECTIL no Fundasaun sira no asuntu seluk hanesan autonomia eskola katólika nian, maibé tanba partisipante barak seidauk koñese CONECTIL, nune’e tempu uza fali atu aprezenta órgaun ofidiál ida-ne’e ninia estrutura no knaar sira.
Nune’e rekomendasaun ikus nian maka superiór/a sira kongregasaun nian no fundasaun ida-dak simu knaar atu estuda fali Estatutu CONECTIL nian no haree filafali nesesidade urjente sira ne’ebé presiza atensaun atu nune’e bele to’o duni ba objetivu instituisaun ne’e nian, hodi hatán ba sinál tempu sira nian hanesan Konsíliu Vaticano II husu.
