Dili – Iha loron 29 Dezembru, iha Sentru Formasaun João Paulo II, joven pratikante hamutuk na’in 23 remata sira nia formasaun durante tinan ida. Joven sira ne’e mai husi ETV S. Maria Mazzarello Venilale. Wainhira sira halo hotu ona sira nia estudu iha eskola refere, sira kontinua kedas ho formasaun profesionál prátiku nian iha área ne’ebé sira estuda ona durante tinan tolu iha ETV. Husi ne’e halo sira sente seguru atu hasoru buka servisu hodi sustenta sira nia moris. Área ne’ebé sira halo formasaun ba mak unidade formasaun paderia iha Mazzarello Bakery, sira nain 11 no unidade formasaun Hotelaria iha centro treinamentu João Paulo II, sira nain 12. Formador/a sira sente haksolok tebes hodi akompaña no tulun sira iha área ne’ebé sira aprende ba.
Iha loron kmanek ne’e mak loron istóriku ba sira nia moris tanba sira halo tranzisaun husi simu formasaun, gia no instrusaun oi-oin ba moris buka rasik atu envolve-an iha sosiedade atu bele moris ho dignu no kualidade. Nune’e iha loron ikus ne’e sira agredese Maromak ba di’ak hotu ne’ebé sira simu durante ne’e no husu nafatin Maromak nia grasa no akompñamentu ba sira nia lao dalan iha moris ne’ebé sira sei hasoru hodi haroha
n hamutuk, tuir mai sira agradese malu ho liafuan no prezente sira. Iha okaziaun ne’e reprezentante Madre Inspetora, Me. Evangelina Xavier, FMA (Vigária Inspetora TIN) hato’o mensajen ruma atu motiva liután joven sira ne’e, Madre dehan: “agradese tebes ba imi nia prezensa iha fatin ne’e, ohin ita hateke fali ba kotuk ba tinan ida hamutuk iha ne’e imi aprende buat barak ne’e formadór/a sira fahe ho imi. Ne’e mak bukae di’ak ne’ebé imi sei lori nafatin. Loroloron sira tutuir imi dehan ba imi atu halo ida ne’e no ida ne’eba, maibe ohin ba oin imi mak sei deside hodi halo buat ruma ba imi nia moris. Nune’e iha futuru imi presiza fó valór ba imi nia moris no saida mak imi halo atu bele moris di’ak liután. agora ba oin imi hamrik mesak hodi determina saida mak imi hakarak fó ba sosiedade, tanba sosiedade ohin loron hein hela buat foun ruma husi imi. Imi sei la depende tan ba ema seluk ka formador/a sira. Buka atu sai sarani di’ak no sidadaun onestu hanesan buat ne’ebé Don Bosco hameno mai ita. Buka atu sai responsavel iha knar ne’ebé halao no importante liu sira ne’e hotu mak nafatin buka Maromak hodi la haluha halo orasaun nafatin. Maria Auxiliadora sei akompaña no tulun imi iha ne’ebé de’it, naran imi nafatin hanoin hodi buka Nia”. Tuir mai sira mós agradese ba formadór/a sira ba formasaun ne’ebé sira simu durante tinan ida, hafoin sira simu sertifikadu ba formasaun nian nu’udar rekoñesimentu no evidensia ba abilidade ne’ebé sira iha durante halao formasaun.
Ikus nian sira espresa sira nia gratidaun hodi repete liafuan sira Santo Padre Francisco nian: “Deskulpa, obrigada no lisensa”; ami husu deskulpa karik durante ne’e ami nia attitude no liafuan sira ne’ebé ami hatudu la monu ba ita bo’ot sira nia laran; ami mós hakarak dehan obrigada wain ba formasaun hotu ne’ebé ami simu, ami la simu de’it formasaun ba abilidade sira maibé liuliu formasaun integrál; no ami husu lisensa atu husik fatin furak no kmanek ida ne’e, ne’ebé halo ami sente hanesan uma atu aprende ho ksolok no enjoy tebes. Ikus liu agradese ba buat hotu”. Sira mós aprezenta dansa no hananu knananuk sira atu halo eventu ne’e sai memória haluha laek nian. Obrigada barak!
(Ir. Domingas Pereira)
