Estuda hamutuk Gaudete et Exsultate
Venilale – Enkontru komunidade nian semana-semana sai espasu ba formasaun kontínua. Ba komunidade Madre Mazzarello, Venilale, espasu enkontru ne’e, hahú ohin, 26 Juñu, dedika ba estuda hamutuk Amu-Papa Francisco nia Ezortasaun apostólika Gaudete et Exsultate kona-ba santidade ne’ebé publika ho data 19 Marsu 2018.
Nu’udar FMA, ita-nia konstituisaun subliña katak “Komunidade sai fatin privilejiadu ba formasaun bainhira, iha ambiente ida família no sasin evanjélika nian, hamutuk haka’as an atu to’o ba santidade iha estilu salezianu” (Konst 82). Liután nia mós hateten katak ita “la’o hamutuk ho foin-sa’e sira iha dalan santidade nian” (Konst.5). Papa Francisco nia ezortasaun sai apelu ida atu fanun fali ita atu haka’as an to’o ba finalidade aas ida-ne’e.
Estudu ne’e fahe tuir kapítulu sira no grupu animasaun litúrjika fulan nian mak gia nia modalidade. Ohin, komunidade depoizde estudu pesoál no reflete mesak, dedika tempu ba kapítulu daruak iha-ne’ebé Amu-Papa deskreve inimigu rua santidade nian: gnostisizmu no pelajianizmu. Partilla hala’o iha orasaun nia laran.
Ir Jacinta Gusmão prepara pergunta-gia ruma ba reflesaun:
- # 41-42: Iha ó-nia moris ó hasoru ema ruma ne’ebé halo ó “hakfodak” no hatudu Kristu nia prezensa iha nia an? Oinsá mak ita buka Na’i no ninia di’ak iha ema ida-idak ita hasoru?
- #45: Papa Francisco no S. João Paulo II fó hanoin mai ita kona-ba tentasaun sente ita-nia an superiór liu ema seluk bainhira ita hanoin ita iha “vantajen” liu nia. Sé mak ema sira ne’ebé iha ó-nia moris ó sente ó iha superioridade ba sira? Oinsá mak ó uza ó-nia koñesimentu ka don sira au hadomi di’ak liután no atinji santidade liután?
- #50: Ó haree ó-nia an la iha pasiénsia ho ó-nia kreximentu iha santidade? Ó iha limitasaun sira ne’ebé grasa de’it mak bele supera ka halakon?
- #54: Ema sé, esperiénsia saida de’it ka don sira ne’ebé mak Maromak haraik ba ó atu sai boot iha santidade? Oinsá ó uza don sira ne’e ho di’ak? Oinsá mak ó uza tempu atu esprime gratidaun ba Maromak iha orasaun?
Bazeia ba partilla, Irmán sira rekoñese katak, loos duni, ita mesak la folin buat ida. Maromak nia grasa no loke an ba Espíritu Santu mak bele fó kbiit atu supera ita-nia frakeza, liuliu ita-nia hanoin katak ita-nia matenek halo ita sai santa ka ho kbiit vontade rasik ita bele sai santa. Tentasaun rua gnostisizmu no pelajianizmu ne’e ohin loron nian duni, iha ne’ebé ema tau nia an iha sentru. Tau an iha sentru halakon fatin ba Maromak no maluk sira.
Irmán sira harohan atu koñesimentu no moris la’ó hamutuk, “teolojia no santidade labele haketak malu”, fiar hatudu iha hahalok karidade. Santidade halo hamutuk ho maluk sira ne’ebé Na’i tau iha ita-nia dalan, ho foin-sa’e sira ne’ebé nia entrega mai ita… Atu ita-nia prezensa hatene halo ema “hakfodak” tan haree Maromak nia grasa servisu iha ita. Atu “Na’i fó mai ita buat ne’ebé Nia haruka”.
