ESTUDANTE MARIA AUXILIADORA SELEBRA FESTA LAURA VICUÑA
Dili – Estudante Maria Auxiliadora Comoro-Dili lahaluha mos selebra Beata Laura Vicuña nia festa. Nune’e ohin loron 22 janeiro grupo Asosiasaun Laura Vicuña nian husi estudante sira rasik, kumprimenta Irman sira, professores no maluk estudante hotu, liu husi poezia no hananu knananuk Laura nian ida, hafoin reza hamutuk orasaun ne’ebe sira prepara ona. Iha poezia sira foti husi Beata Laura Vicuña nia liafuan ne’ebe dehan: Iha ne’e mak hau haburas ksolok hodi halo belun ho Jesus no Maria no tanba domin hau pronto atu saran an nu’udar vitima sakrifisiu nian ba hau nia mama. Nune’e Laura nia moris hanesan ai-funan ida ne’ebe naburas iha Jardin salesiana, ohin loron nia funan fó morin ba mundu. Ho ninia liafuan simples ida ne’e, atrai labarik sira iha hakarak atu hatene nia istoria no nia moris. Hanesan hatutan Sr. Suzana iha nia bondia katak Laura ne’e kiik kedas hatene ona saida mak sala no di’ak, no iha ninia motto dehan: “Terus nonok haksolok nafatin”. Ho Laura nia ezemplu moris nian no motto ida ne’e, hanorin labarik sira atu hatene valor sira: Sakrifisiu, terus, fiar no domin ba Maromak no maluk sira. Tan ne’e sira dehan Laura, husi o ami aprende haksolok, badinas, laran luak, domin no komprende sala nia konsekuénsia sira.
(Sr. Onesiana)
